PANTOEN - CAE ACEH AZEUB JEUNAZAH
Oleh : ABU BINEH KRUNG
Syukur keu Rabbon,sidroe esa
Seulaweut saleum, keu muhammaddon
Pengikot kaom, dum manusia
Mangat na adab, salam 'alaikom
Peu neu jeug kaom, bak zat yang esa
Neu suot saleum, kaman dum kaom
Mangat ta sambong, taloe sau dara
Keu bhah agama, ka lewat panton
Keu noe rakan long, neu deu ngoe haba
Na saboh haba, karangan bak lon
Asoe lam panton, manyet sengsara
Hudep di dunia, bek laloe kaom
Neu duk ngon nedong, ingat rabbana
Beu na neu ingat, wahe e kawoem
Watei geu lambong, dalam keu reunda
Yoh watei hudep, neu pujoe rabbon
Wajeb hai kaom, ingat keu esa
Ingat peu rintah, keu si droe rabbon
Yang geu tham ampon, bek takeu rija
Meu nan keuh hideh, wajeb hai ampon
Wahe adoe lon, maksut lon peu gah
Beu ta ibadat, gata adoe lon
Nyoe tan hai kaom, hudeb meu rana
Nyoe tan ilmei, rugoe adoe lon
Azeub geu himpon, geu balah dosa
Cukop that saket, siksa awai phon
Han jeut ji tulong, dak jai hareu ta
Lab meu deuh tae, dosa rakan lon
Siksa geu lambong, u ateuh gata
Beu na ta ingat, peu rintah rabbon
Neuklik neu ranggong, nibak mussalla
Alah hana deuh, dosa rakan lon
Azeub geu peu tron, si noe di donya
Meu nyoe deuh tae, Allah hai Po lon
Peu deh that untong, hudeb di donya
Oh trok lam uruk, sinan geu himpon
Nyoe goetxhai kaom, asoe churuga
Teu keu di gata, dosa meu himpon
Balasan kaom, asoe nuraka
Ta beu doh jinoe, wajeb ta pu phon
Langkah ta hayoen, pujoe rabbana
Ka nibak buet brok, bek le tarihon
Keudeh ta lambong, tik ateuh para
Beu na tapateh, keu si droe rabbon
Yang Maha Agong, keu po yang esa
Bek singoh teu lah, nyesal rakan lon
Lam uruk tutoeng, geu azeb seksa
Hana le guna, tamoe rakan lon
Talakei tulong, katan soe bela
Hudeb di dunia, amai ta himpon
Tapujoe Rabbon, bek sagai lupa
Akhirul kalam, akhe bak panton
Meuah keu ulon, nasehat lon ba
ABU BINEH KRUNG, bukon lah abon
Kalewat panton, nasehat lon ba