PANTOEN - CAE ACEH KISAH IE RAH JAROE KEU PEUNAWA
OLEH: Misraa Poetrie Alexsya
Salam a'laikom kawom lam maya
Mudi ngon muda saleum lon peutroh
Lon keuneuk tuleh lam bareh rika
Saboh cerita yang ka meu bungkoh
Masa yoh jameun lam ruweung desa
Na ureung tuha umu lapan ploh
Tinggai ngon cuco tansoe seuleua
gampong trieng bangka desa uloen boh
teuma di cucoe meubagoe duka
wahe syedara meuleumpah sungkoh
iduek peunyaket budok ngoen kista
leumah that hina ban saboh tuboh
Rakyat ji peulet tilet lam desa
Ureung nyan dua diyue jak juoh
Seubab peunyaket ayeb that hina
Nanoh lam luka dum beucoh beucoh
ureung nyan geu jak tapak geu puta
lam uteung rimba keudeh geu piyoh
Panteu geu ato jambo geu puga
Bek tho uroe kha bek phak ujeun toh
bak laen kisah madah ceurita
Tujoh pemuda teuga ngoen seungkoh
peuleumah reman hantam soe yang na
peu buet peu saja hajat jih beutroh
buleun meugantoe uroe meutuka
di peugot keurja meuleumpah angkoh
rata duem di cue di hue peu hawa
cukop ceulaka awak nyan tujoh
teuka teukeudi rabbi ta'ala
kheundak rabbana han ek peu jioh
bak saboh watei lagei tan nyata
meu sapeu hana ho hoe yang di bloh
Baroe koen sabe tan pre na laba
Meu juta-juta meu rutoh rutoh
nibak uroe nyan ka meunan kaqa
han ek di kira di pike hantroh
Hana meu sidroe meusoe di sandra
rangkap di theun na hana chiet soe roh
siminggu leubeh saheh ka sep jra
Abeh beulanja tan meupeu pajoh
habeh peu yang na tan na peu seuba
habeh teunaga badan ka awoh
meu hoe di peutak geureuntak di ba
han tumei raba meu saboh bungkoh
bak duek meupakat meuriwat cara
kiban tanyoe ka papa sang katroh
ta jak ek ugle keudeh lam rimba
taroen ta mita tajak theun lapoh
kadang meutumeung meu saboh dua
ka sep teunaga untuk seumeusoh
meunyoe lage nyoe tanyoe syedara
han ta keurija han meupu pajoh
lajue beurangkat keudeh lam rimba
tujoh peumuda pancuri sungkoh
teungoh di jak jak tapak di hila
leumah cayaha panyoet nan suloh
Keunan ju peutoe tujoh droe apa
Watee ka senja lewat poh siploh
Sabe keu droe2 di ujoe haba
Bek na yg peu jra ureng poe lampoh
Kakeuh bi saleum ngon seunyum sapa
Leumbot suara ngon mata layoh
Oh tee ban geu eu le ureung tuha
Gobnyan geusangka aulia tujoh
Laju yue tamong teurimong lanja
Ka geu peu taba boh bi teureuboh
Ka geutaguen bu dumpeu seureuta
Seala kada ka geuyue pajoh
Iklah that hate nek kude buta
Seubab geukira aulia tujoh
Meunan geu pike le ureung tuha
Geu peumulia sep goet geu uroh
Oh lheuh nyan teuman awaknyan seuba
Maklum syedara geureuda sampoh
Di lakee izin pingin ji gisa
Ji khem meu haha oh ban ka juoh
Ngon seubab yakin batin lam dada
Di nek nyan teuma bit sunggoh-sunggoh
Cok ie rah jaroe keudo pemuda
Geuniet peunawa ubat geu neuk beoh
Geucok lah ie nyan yoh nyan geu peusa
Ka geurah muka cuco yg awoh
Deungon bismillah berkah aulia
Siram le sigra u ateuh tuboh
KHeundak tuhanku hu siklep mata
Budok ngon kista banmandum duroh
Hana le meu bee puree ngon luka
Kulet meugisa ban sutra haloh..
NOTE:
KEIKHLASAN ITU SEPERTI POHON KAYU YANG TUMBUH BEGITU SAJA,TANPA PERNAH BERTANYA MENGAPA IA TUMBUH.
KARENA PERCAYA BAHWA IA DI CIPTAKAN ALLAH DENGAN SEMPURNA TANPA PERCUMA