PANTOEN - CAE ACEH MEUCIKOT KEU SUKRET MAWOT
OLEH : AKHBAR AL-MUTAWASSILA
Watee jiteubit jawong lam badan
Baroe disinan geutanyoe jaga
Ureung bahgia matee lam iman
Laen nibak nyan matee cilaka
Meungsoe nyang tingat keupada Tuhan
Nibak masa nyan chit hana goga
Teuma yang tingat seulaen Rabban
Meumacam-macam syaithan peudaya
Baci neupeugah hai rakan-rakan
Fi hadzal Waqtan soe tulong gata
Adak digata raya jabatan
Harta meukuyan sahbat pih teuga
Soe jeut mat jaroe geuba nak aman
Meunghadap Tuhan deungon Bahgia
Aneuk peureumoh syahra ngon rakan
Paleng jeut gobnyan geubaca do'a
Ureung nyang sukret geu ibaratkan
Umpama "Kapai", lam "Laot Raya"
"Geulumbang Tujoh" keunong bak kapai
Ladoem chit "Tiang patah meuleu-a"
Na chit "keumudoe hana soe kawai"
Ladoem hai taulan "Aleu teubuka"
Meungsoe nyang "kapai" masa nyan "Karam"
TAN HANDAI TAULAN NYANG TULONG GATA