PANTOEN - CAE ACEH SEUJARAH LAMPOE DUDOE SI CUPAK
OLEH: Lisa Ulfa
Salam'alaikum mula phon sajak
Saleum sicupak keu cendra mata
Geunantoe lon joek ie joek ngon rujak
Geunantoe kulak ngoen boh kupila
Sira neuduek duek hai ibuk bapak
Baca nyoe sajak sastra budaya
Kadang cit kadang na nyang neugalak
Kadang hai cut kak mauizah pih na
Sejarah lampoe lon puwoe sikrak
Pakiban curak hudep manusia
Ureung lam gampong santon ngoen bijak
Sabe lam kompak jareung na dawa
Debat meudebat kureung geugalak
Pue pue nyang ken hak pih tan geuloba
Sikap ngon jiran baksang sibapak
Ban adoe kakak tamse saboh ma
Tulong teumulong geuayon tapak
Dumho geutem rhak bantu saudara
Hana geuharap keu meuh ngon perak
Pih tan geugalak nilai rupia
Jithei u luwa aceh nyoe bijak
Aceh nyoe kompak bangsa nyang kaya
Aceh pih makmu dumpeue na di bak
Allah keuhendak Aceh Sejahtra
Jameun lawet nyoe meunoe keuh corak
Geutem meutak-tak ngen wab sideupa
Ureung lam gampoeng ka kureung kompak
Kadeuh na jarak antar saudara
Hudep ka napsi meukotak-kotak
Meungsoe geugalak nyan keuh saudara
Walau sikandoeng adoe saboh mak
Meunyoe ka palak putoh syedara
Ohoi sep aneh rumeh ka supak
Abeh phak luyak keuneubah bangsa
Individualis pih ka meukuprak
Hubungan retak akor tanle na
Karna pemimpin han sa geugalak
Geutem seumipak adoe dengoen a
Phon-phon jeut seubab geurap geucikak
Punca jih hai pak tuto bahasa
Meunyoe bak kalam ka tanle bijak
Tenak-teumeunak mudah kelua
Meunyoe ka mudah babah teumeunak
Tinggai preh hai nyak tampa-teumampa
Segoh jeut pake pike beulagak
Pat toeh semarak tanyoe meudawa
Beda pendapat bek that takuak
Takot hai bapak tuboh binasa
Meunyoe kalipeh gaseh ka reutak
Iblih sep galak jipreh-preh dawa
Jipreh-preh pake sare jisurak
Saket tangkurak tanyoe nyang rasa