PANTOEN ACEH Cae Kisah : SEUTOT YANG HANA
Salam'alaikum saleum mulia
Allah Ta'ala sabee tapujoe
Seulaweut Saleum khatam Ambiya
Al-Keuluarga laju bansigoe
Geutabu bijeh yoh goh seumula
Watee ie beuna ureung dum geumoe
Deungon bismillah lon mula rika
Lam haba sastra makna lon pasoe
Bak saboh nanggroe lam saboh masa
Na sidroe raja kaya han bagoe
Peu-peu nyang geuheut na ngon peucara
Dumnan jai harta akan raja nyoe
Akan teutapi hatee baginda
Hatee geuh goga tan mangat asoe
Hana tom teuntram meutan bahgia
Sosah lagoina sabee tiep uroe
Maken si uroe han teupet mata
Malam meujaga ka pijuet asoe
Bak saboh masa dileun Astana
Geuduk meusaja pikee naseb droe
Geukalon teuma ureung keurija
Na buruh gasa sampoh seuramoe
Meuhi geukalon jeurneh ie muka
Seunang bahgia leumah tiep uroe
Diteuka iri baginda raja
Pakon bahgia rakyat ulon nyoe
Kon lagee dilon pangkat kuh raja
Tahta ngon harta sabee meusiboe
Padahai gaji dijih tan raya
Lom hana kaya akan ureung nyoe
Rumoh geutinggai sep seuderhana
Makanan dak na tanna meuranjoe
Maken reun-mareun didalam dada
Geuhoi Peutuha Wazir raja nyoe
"Wahee e Wazir, lon sosah raya
Tan bahagia rasa hatee nyoe"
"Kukalon saknyoe rakyat jeulata
Tukang Keurija Sampoh seuramoe
Sabee kukalon jih sang bahgia
Jeurneh ie muka sabee tiep uroe"
"Diyub bak kayee 'oh kalheuh krija
Teungeut ngon sigra laju meungroe-groe
Lagee tan beban ateuh rhueng donya
Adak tan harta hudep ureung nyoe"
"Pakri keuh meunan meungpu karena
Neujaweub lanja bantu ulon nyoe?"
Han Ek geupikee oleh sang raja
Wazir ngon sigra pikee atra nyoe
Wazir teuseuheh banlheuh geucerna
Pikiran raja nyang teungoh kacho
"Doli Tuanku hormat paduka
Chit mudah saja soalan bunoe"
"Nyang seumampoh broh baci neucuba
Hadiah neuba akan ureung nyoe
Baci neujok peng jumlah sijuta
Hadiah raja khusus malam nyoe"
"Neukureung jumlah siribee saja
Meunan neusaja neukalon dudoe
Peunyang teujadi chit akan nyata
Tanyong paduka meujaweub keudroe"
Malam nyan laju titah paduka
Sidroe Bentara geujak peusampoe
Geubri ju saleum meuban troh teuka
Hadiah raja geujok lam jaroe
" Nyompat raseuki geubri lee raja
Na peng sijuta ka geujok saknyoe"
Ureung seumampoh cukop bahgia
Teuma Bentara laju geujak woe
Didalam rumoh amplop geubuka
Laju geukira oleh ureung nyoe
Kureung siribee dari Sijuta
Na 4 goe kira teutap lagee nyoe
Sang nyoe na yang rhot si oen bak geuba
Laju geumita dileun rumoh nyoe
Ban hana sinan langkah geuputa
Jalan Astana mata geuh sheh soe
Ka beungoh uroe mantong geumita
Mangat sijuta hadiah bunoe
Dak geu seumampoh seunang ka hana
Meureu'op saja muka geuh jinoe
Ban Raja kalon ka meunan cara
Wazir troh teuka geupeugah jinoe
"Meunan keuh hudep Ladoem manusia
ATRA NYANG HANA sabee tapakoe"
" Nikmat yang kana TUWOE TAKIRA
ADAK MEUJUTA Tuhan peusampoe,
LADOEM YOH GASIEN HUDEP BAHGIA
'OH WATEE KAYA LADOEM MEUPALOE"
Tutu Krueng Tingkeum kalheuh jibuka
Moto ngon honda jeut dijak jinoe
Calitra Tamat ka meuhoe punca
Pat-pat nyang cupa peugah bak lon nyoe
Lon ureung La-eh nibak meurika
Lon jak sikula awai pih beu-oe
Adak na lon beut tan Leubeh glah sa
Neumaklom saja pat hana bakoe