PANTOEN ACEH - CAEE ACEH GASEH MEUPAYEUK
OLEH : LISA ULFA
Teubentang faja cahya meusipreuk
Geulumbang riyeuk bicah u pante
Deungon Ie mata rika lon kaphuk
Keunoe lam fesbuk posting sige ble
Mula phon kisah indah meubentuk
Wate nyan lon duek glah 3 SMP
Lon jak sikula tiep masa lon seuk
Bit keubit lon meuk galak buken le
Meuheut dilon nyoe ranjoe meupeuseuk
Ubena uruek lon dhoe beusare
Lahe lam susah bak ayah ibuk
Bek sit diyup bruek sampoe'an mate
Maka dari nyan Hai fan-fan canggruk
Hajat that lon pluek nasib nyang kere
Lon jak sikula tiep masa lon meuk
Meuheut that lon duek bak kursi awe
Walau nyum badan terkadang sijuek
Tetap lon sipreuk bram-brum Ie jile
Sipatu lon soek seb broek ngen guruek
Kayem that cangguek disinan hade
Beuthat pih meujak ngen tapak lon seuk
Bajei meupayeuk lon sok-sok sabe
Hanjeut keu cantoi walau rhoi paneuk
Juga lam paruek tan meusirupe
Buken keu riya haba lon kasyuk
Memang lon aneuk caroeng buken le
Hanatom Alpa, A tan meusineuk
Rangking han meuseuk, juara sabe
Ulon geusayang le ibuk ibuk
Hantom geutupuek baten ngen lahe
Awak lam lokal ihwal seb gabuek
Oeh brat meuraphuek sikula lon pre
Tamat SMP hanle ulon duek
Cukop bit gabuek ulee semike
Beujeut lon sambong bek puntong enteuk
Rela lon theun deuk asai beusampe
Dengon Qudrah Po rahmat neusipreuk
Dak gabuek - gabuek dudoe meuhase
Lon ka SMA lam dada sijuek
Cita keu Ibuk karab meuhase
Tamse pepatah sihah han meuseuk
Meunyoe kana meuk cinta lam hate
Walaupun Raja loba jicaluek
Tahta jipeuduek demi bohate
Meunan cit ulon kuntom senireuk
Gaseh ka jiduek lam lubok hate
Keu sidroe Akhi dari Lampuuek
Jantong lon grak-gruk oeh deuh sige ble
Jaroe lon prok-prok buken tok sineuk
Ureung lon gabuek saban dihate
Ngen takdir Allah mudah teubentuk
Senang lon Hai buk sang karab mate
Singkat cerita cinta meupuuek
Niet phon yang ka ruek hanle lon pike
Nibak sikula tanle lon jingeuk
Lalei lon duek-duek dengon bohate
Tapi Hai sahbah salah lon sineuk
Wab lon jok aweuk bak ureung jahe
Rupajih cinta geupura gusuek
Dudoe lon heuk heuk Ie mata han pre
Hana lon sangka cinta rimueng pluek
Gaseh bang kapluek gaseh yang KW
Ulon geukubah dua ngen aneuk
Oeh leuh geutaleuk nafkah pih tanle
Meunyum bit seudeh gaseh meupayeuk
Suuem ngen sijuek wate lon pike
Hudep lam susah deuk troe deuk deuk deuk
Dua ngen aneuk nibak gaki gle
Pade lon pula baja lon sipreuk
Harapan enteuk akan na wase
Walau lam seudeh gaseh keu aneuk
Akan lon gusuek sampo'an mate
Oeh teuka malam bintang teuduek-duek
Ngen gense paneuk lon tuleh cae
Saboh karangan Hai rakan pehbuk
Sira neuduk-duk baca laju le
Buken cit fakta rika lon sipreuk
Cae nyoe Hai buk ken asoe hate
Bak laen masa tasamboeng enteuk
Meupat yang guruek tadhoe besare