Pantoen Aceh - Caee Aceh Kisah Sidroe Nyang Faki
oleh : LISA ULFASadeup lam geutiek geutijik sudong
Sibak rukok on geulhat bak bibi
Lam reuneum suboh teh-toh bak jurong
Meunan keuh untong sidro nyang faki
Geujak tueng upah bak rata ampon
Beuthat ujeun tron geutem grak gaki
Nyang breuh siare tentee geusuon
Nafkah geujunjong keu aneuk istri
Teumoe meukhak-khak sinyak Lam ayon
Poma peulindong Ie susu geubi
Geutimang manja sira geulanton
Meualon-alon seulaweut Nabi
Matauroe ek matauroe tron
Meunyum bei harom minyeuk kasturi
Geuharap sinyak singoh beumuphom
Beunalah hukom jitem ta'ati
Laen cerita Ayah di keubon
Lam uroe tutong geusiboe capli
Meu jeum meuuroe meugantoe meuthon
Reu'oh bak ubon teuduek meuriti
Meukru semangat rahmat meuhimpon
Akan ilahon hana geubenci
Hudep lam faki ken arti racon
Meunan geumeuphom lam sanubari
Uroe meutuka senja meugulong
Buleun dengon thon sileh berganti
Sinyak kuat moe jinoe ka ganteng
Rame gop sanjong meunan deuh nyali
Dijih ka kaya laksana ampon
lam rumoh geudong diw'et-w'et gaki
Harta meukunyan Sinan dihimpon
Gelar disuon siraja judi
Haleu ngen hareum memang jimuphom
Walau dak muphom han jipadoli
Nafkah dimita ngen murka Rabbon
Bak jalan sirong ka meubloh gaki
Ie mata brep brop tep top bak lukom
Po hate rihon ayah ngon ummi
Teuingat aneuk hanjeut geutulong
Bohate jantong ka lam buet keji
Beuthat ka kaya permata harom
Gubok bubong on mantoeng teupatri
Terasa nyaman sinan lam gampong
Bak sagoe duson tinggai si faki
Bantuan aneuk watei dikunjong
Hana meusion geucok oeh jibi
Hana geuhawa bit han geusanjong
Dak peudeh untong nyang geurasai
Sadeup lam geutiek geutijik sudong
Sibak rukok on geulhat bak bibi
Lam reuneum suboh teh-toh bak jurong
Meunan lam gampong kerja si faki
Geujak tueng upah bak rata ampon
Nafkah geujunjong doa bak Rabbi
Nyang breuh siare tentee geusuon
Beuthat asoe kom engkoet masen tri
Meukru semangat rahmat meuhimpon
Akan Ilahon hana geubenci
Hudep lam faki ken arti racon
Meunan geumeuphom lam sanubari