Meuturi Dek TI
Saleuem ulón bri intan keugata,
Lón peu-ét saleuem keuticém nuri
Beu-ék Tuhan bri sampoë ban pinta.
Syahdan lon tuleh, didalam rawi
Meu'ah e dék ti, nyang ulön cinta,
Seu ot saleuem lön, e wahee Dek Ti
Lön nak meuturi, intan ngon gata.
Beurayek ampön, keu lón nyang faki
Aéb ngon keuji, dagang nyang hina,
Allah adoë cut, poe bungong giri
Saleuem ulón bri, salèh meulia.
Saleuem lön laheé, ngon haté suci
Bak ék Tuhan bri, sampoë ban pinta,
Han-ék lön pandang, bintang Jauhari
Tiwah baiduri, buleuen purnama.
Padum tréb sabé, haté lón sangsi
Ulón keumeung bri, surat keu gata,
Kareuna gata, e dék putéh di
Ureueng gob turi, sukèe meunama.
Bintang keujoera, cahya berseri
Hanlé jitém lhi, bak langèt dönya,
Gaséh keu adék, han-ék lön kheun kri
Tuhanku Rabbi nyang thèe sibeuna.
Pucak Seulawah, dua sijoeli
Gunong nyang sakti, ateueh rueng dönya,
Meunyo na tuah, iradah Rabbi
Sampoë Tuhan bri, lön meusampeuna.
Putéh haté lón, hai nyak putéh di
Surat ulón bri, keutanda mata,
Tanda seutia, cinta nyang kawi ,
Haté lön suci, intan keugata.
Teuma digata, e dék putéh di
Salèh cit pakri, keulón nyang hina,
Beukeuti na gaséh, bak gata nyak ti
Cuba adék bri, sipatah haba.
Hadjat lön teuka, lön nak meuturi
Pakri lön tukri, sang malèe mata,
Meu'ah dèsya lön, tanglöng kudangdi
Lön meung meuturi, intan ngon gata.
Keureutaih putéh, geunantoë diri
Daweuet hai ukhti, geunantoë mata,
Bèk, tabri aéb keulön, hai njak ti
Sikrak ulón bri, narit rahsia.
Kapai teureubang, lam awan tinggi
Pulang peureugi, u Kutaradja,
Gaséh ngon sayang, intan putéh di
Surat cut bang bri, nak mupeue haba.
Alhamdulillah,leupah that suci
Tuhanku Rabbi, Maha Kuasa,
Beureukat dö'a, karönya Rabbi
Beu-ék meuturi, geutanjoë dua.