PANTOEN - CAE ACEH SIFEUT AULIA BAK TANYOE HAMBA
OLEH: UBAYYA HAMDAN AL-ALAWYsalam alaikom warahmatullah
jaroe loen peuhah nak sah loen sapa
ta maba pujoe puwoe keu allah
salah ngoen shalah rasul mustafa
izin keu murid hai guree nambah
loen neuk meu kisah bak donya manya
saweub nyoe aneuk reuteuk ban mirah
meutuleung lidah meunan umpama
na uloen dingoe meunoe peuneugah
guree yang surah bak dayah rama
hudep geutanyoe lam bumoe allah
raya faedah nyoe ta tem guna
sifeut aulia muliya meugah
tuhan peu singgah ka nibak hamba
hamba pilihan amalan yang sah
meunan le surah rata uluma
teuma malam nyoe dingoe hai sahbah
sifeut yang meugah allah bri rata
meu soe ek pubuet turoet poe tallah
ngoen insyaallah lebeh mulia
syarat yang keu phon beu le seudeqah
hanjeut na pilah boeh teungoh papa
hanjeut na beda lam watei susah
dalam seudeukah beu saban qada
miseu umpama contoh yang indah
uloen hai sahbah uroenyoe kaya
rata jeut sagoe pupoe seudeqah
adak oen mirah hana loen kira
teuma nyoe singoeh miseu loen susah
bak brie seudeqah ka oen rupiya
ka kriet bak loen bri meugriet ngoen apah
nyan meunan kisah gohlom geu kira
baroe seb syarat wahe kak beusah
kaya ngoen susah seudekah beuna
bunoe ngoen singoeh beutroh ikheulah
dak tan peng bicah seudekah sigra
syarat keu dua hai apa basyah
bak theun amarah deungoen teutangga
lam teungoeh deugee matee jeut yang pah
beu neu peu meu'ah beutroh lam dada
lam teungoh bungeh ka deungoen icah
na sifeut meuah ka nibak gata
nyoe ka beh bungeh mata tan mirah
roe ta peu meuah syarat ka cupa
ka nibak akhei lahei lam madah
lam ayat allah tafsir loen baca
cukop meu untong gampong akhirah
di donya meugah dan loem mulia
allah neu janji ummi ngoen ayah
lam cinta allah ureng yang taqwa
lam kebajikan dak tiep tiep sa'ah
hate ikheulah neu harap ridha
etnoe meumada lon cuba kisah
menyoe na salah tuloeng pareksa
seubab loen ubeut lam neubeut kisah
ilme gohlom pah hai guree dumna
bak akhei kalam nak mameh kuah
sira loen tamah bek tabeu rasa
meuhoe ka Polem Kuta Piadah
kiban fatihah ka roeh neu baca?
menyoe han roeh ka hansah nikah
buet Apa peugah malam baroesa
nyoe han neu pateh polem meutuah
neu tanyoeng bagah bak sinyak Hendra