ENTREPRENEUR ISLAM SAIDIL AMBIYA WAL MURSALIN
OLEH :Hendra Underline
Wate ujuen troen teutop ngon reudok
Mula phon kalam didalam panton
Salam'alaikom keuno lon antok
.
Pujoe keu tuhan yang maha agong
Keu sidroe rabbon mandum tapeujok
Nyang peujuet alam rindham meususon
Makhluk meuhimpon punoh meupudok
.
Geupeujuet kaye bate ube tong
Geupeujuet lutong troh bak peulandok
Geupeujuet bumoe meunoe tan ujong
Yang han pateh lon beutimoh beudok
.
Meukruseumangat rahmat meulambong
Di keude geudong di meukat ie jok
Seulaweut saleum mandum tajunjong
Keu muhammadon rasul dudoe trok
.
Al ngon sahabat leugat tasambong
Nyang saban arong bak dheu deungon lhok
Geutem roe darah peusiblah untong
Peurintah rabbon sabe geu anggok
.
Deungon bismillah madah lon peuphon
Cae ulon roen keuno dube eok
Meupat nyang salah neuseukah sirong
Gure neutulong peupaih lom neurok
.
Kisah ulon ba pemuda gantong
Masa saboh don dile hai datok
Dikota mekkah rap ka'bah agong
Peunawa jantong inan keuh rayok
.
Aneuk abdullah meugah that santon
Dithei hai ampon sifeut hana brok
Akai ngon akhlak lagak meu alon
Mandum teusanjong teuanggok anggok
.
Ateuh bak pala ditapa tiong
Dicong keurundong burong kutok tok
Singkat calitra haba lam panton
Pemuda nyan tron na keurja gob jok
.
Na sidroe putroe uboe lam gampong
Kaya meukupong harta meutumpok
Gob nyan peureule peumagke katon
Urueng yang muphom meukat dumho trok
.
Nibak muhammad geupeumat palong
Barang meububong punoh rata plok
Geuyue niaga masa rap sithon
Jioh alaihom meukat hai datok
.
Dinanggro mekkah langkah neu ayon
Nanggro syam ampon keudeh meusarok
Sidumnan jeuoh troh bak geu arong
Geupuwoe untong meutagok tagok
.
Rap saboh raga laba geuhitong
Putroe teusanjong sampoe ujong eok
Seubab baroekon hantom meu keuphon
Meunan hai kaom laba meutumpok
.
Siti khadijah ceudah ngon anggon
Disinan keuh phon cinta meusarok
Nibak nafisah geupeugah langsong
Geuyeu jak kunjong kumbang dijulok
.
Haba bak wareh silapeh peutron
Geuyu poet kuntom bak teungoh leubok
Nafisah bungka gisa u geudong
Geupreh di anjong kumbang pajan trok
.
Hana trep tempoe uroe ban meundong
Urueng geurihon balasan geujok
Geuba seulangke seupre ngon pawon
Bungong bei harom tangke geukudok
.
Lheuh nyan jeulame geume han sirong
Kon meuh ngon kalong bak takeu biok
Dua ploh unta geuba han tanggong
Nyan dum hai ampon sanggob bak geukok
.
Nibak nyoe masa cuba ta peutron
Takira hitong padum na geujok
Yum 40 juta nyoe unta busong
Yang sehat ampon meu 60 pih trok
.
Gasin peu kaya pemuda gantong
Waploh limong thon umu meutampok
Dum nan jeulame geume kawen phon
Kon tanggong-tanggong keu tulueng rusok
.
Nyoe ka meumada rika ka puntong
Kisah lon gulong meuah pat yang brok
Deungon wasalam kalam bak ujong
Teuma ta sambong bak laen tarok.
Ringkasan :
Nabi Muhammad geu meukawen umu 25 thon, keu jeulame 20 boh unta.
Nyan ngon sidroe urueng inong janda geumeukawen.
Man nyoe aneuk dara jinoe sep ngon seperangkat alat sholat kon kop jroh.
Nabi Muhammad bekerja antar negara sebagai pedagang sukses.
Man nyo aneuk muda jino digampong dikuwin kon kop meusaneut.