PEMENANG SAYEMBARA PANTOEN - CAE ACEH MENYAMBUT MAULID NABI MUHAMMAD S.A.W TAHUN 2018
PEMENANG SAYEMBARA PANTOEN - CAE ACEH
- JUARA I
LAHE NABI MUHAMMAD S.A.W
Taplah keupapeun cabeung kayèë gléRumoh teu uké rinyeun aneuk lhèë
Salam'alaikum saleum lam caé
Bèk riya haté ta'zém keugurèë
Lôn peunyum peunyum jangeun bèk ganjé
Juri nyang adé höreumat dilèë
Peserta mandum saleum hana pré
Banda ngòn panté jeut mandum sukèë
Masa yôh jameun padum na jahé
Rata sagoë bé jimeu'en batèë
Inòng hana yum meupeung meukudé
Adak ta tamsé bungöng ka layèë
Han pue tahireun keu ureung kafé
Iman hana lé 'iktikeut padèë
Ji seumah apui ngon patông sabé
Na ladôm peurté di seumah kayèë
Tan trôh sibuleun aneuk ban lahé
Ditém pöh maté rela diseubèë
Dawôk buet hareum meunakeun bangké
Soë teugah tanlé wahé ë sampèë
Meukru seumangat kilat meublé-blé
Tuhan nyang Adé rahmat pih geuplèë
Ban faja meuhat mangat bèë kòn lé
Kareuna lahé sidroë Pang Ulèë
Abdul mutalléb gapét bohaté
Cucoë lam seupré geucök geupangkèë
Geu atô langkah bak babah ziké
Tujôh goë suwé ka'bah nyang jithèë
Di Abu Lahab seumangat haté
Sampoë geugrôp ché di dalam abèë
Gembira that-that geurawôn rawé
Hai rakan sambé geusurak han brèë
Meukarna seubab MUHAMMAD lahé
Lamiet jröh pi-é peulheuh lam angkèë
Geu peumulia saidina hadé
Beuthat pih akhé abu meulagèë
Maté dum apui patông dum reulé
Peuseumah kafé Allah peugèsèë
Nyan keuh mu'jizat hebat bukòn lé
Soë ék seumiké ngön akai ulèë ?
Angèn ròt barat meujungkat padé
Dalam ië dilé hanyot böh jambèë
Meuhoë ka ummat seupakat sabé
Gigoë bèk seungké kap pisang salèë
Bak buleun molòd tabòt-bòt cupé
Bèk that neupiké keuyuëk ôn ribèë
Kurbeun binatang bèk nyang ka renggé
Cök manok udé ngòn nyang rhui bulèë
Bahpih bideu'ah göp peugah tan pré
Pubuët laju lé bëh rakan ritèë
Para Ulama pih hana deugé
Peu ingat sabé lahé pang hulèë
Baca seulaweut beut ngòn dala-é
Jeut tayuë hadé santri di balèë
Deungòn irama geubaca diké
Irama reugé mamèh ban teubèë
Aneuk tulô breuh ateuh bak awé
Nyang keunòng budé aneuk ceurapèë
'Et noe lôn karang bèk panyang sya-é
Ka iduëk gambé bak reugam gènsèë
Kadang chit kisah salah lôn cungké
Meu'ah beusaré lôn tuan lakèë
Bukòn pujangga atau S.P.D.
Aneuk miët S.D. nyang intat patèë
Nomor Peserta: 0016
Nama Akun fb : Musri Na Katuri
Nama Asli : Musri
Alamat : Idi Rayek ACEH TIMUR