PEMENANG SAYEMBARA PANTOEN - CAE ACEH MENYAMBUT MAULID NABI MUHAMMAD S.A.W TAHUN 2018
PEMENANG SAYEMBARA PANTOEN - CAE ACEH
- JUARA V
MAULID NABI
Mata yang kalon,babah yang peugahDengon bismillah,teuboh yang sehat
Salam alaikum warah matullah
Kawom meutuah ummat muhammad
Puji ngon pujoe keusidroe allah
Yang maha qudrah seureta hayyat
Seulaweut saleum keurasulullah
Ngon al-sahabah yang seutia that
Keupeunitiya yang ramah tamah
Ngon juri madah ngon peunasehat
Yang kaneusapeh bangket hikayah
Lam hate ikhlah saleum horeumat
Deungon izin poe uloen meutitah
Alhamdulillah saleng meuingat
Sidroe peujuwang yang taneuk peugah
Lam jahiliyah meucukop dasyat
Sigoeh lom lahe pangeran gagah
Awai teucurah di dalam kitab
Nabi yang akhe utusan allah
Tanle geutamah donya akhirat
Oeh ban kalahe dinangroe mekah
Nibak thoen gajah lheuh uroe ahat
Meungnan di ayah teunte abdullah
Ummi aminah bonda muhammad
Kalheuh meukhatan hanale hadah
Hate pih geurah le mala'ikat
Iri ngon dengki hasut ngon fitnah
Bandum geupinah suci kameuhat
Khendak bak tuhan gopnyan meutugah
Deungon peurintah bak poe hazirat
Ngon lemah lembut wate neudakwah
Deumi keu ummah beukeuh seulamat
Olheuh dimeukah dudoe neuhijrah
Nangroe madinah deungon keurabat
Seubab peunyebab singkat loen ilah
Fakta ka tugah nyoe bak hakikat
Madinah goh brei mantong meupup dah
Pante di seumah leubeh loem gawat
Nibak masanyan oeh neu'eu ummah
Bangai sileumpah ramei yang sisat
Oehte tabayang yaaa masyaallah
Rasul meudakwah cukop muslihat
Beuthat rintangan laoet meudarah
Bulei han reubah kulet han cacat
Leo manusiya salah meunyalah
Kaleubeh fitrah nyoe bak meu'upat
Beda that jinoe carong meulempah
Keu'hukom allah kameuphom that that
Meukru seumangat rahmat meulimpah
Islam meujerlah hana meuhambat
Ka'ek tanyoe pham harom makrifah
Seumpurna kasah hudep syariat
Beureukat nabi peusuroh allah
Dak haloeh halah beulam ibadat
Beuleo seulaweut beucaye gapah
Ziker keu nafah meudarah urat
Dakjeut maulid nyoe leubeh meu'ubah
Beukeuh meutamah akhlak yg mantap
Hek that that nabi nibak geupapah
Islam yang kaffah peunoh ngon adap
Nyoe kheun peunutoh bak waliyullah
Hate yang ikhlah meu uboe nikmat
Seusama ummah bek meupeusalah
Hana mu'i'dah yang meunamfaat
Tinggai tulesan bagoe aruwah
Oeh habeh darah teuboh kapucat
Leubeh ngon kureung loen lake meuah
Maklum yang kisah peumuda batat
Bukon juwara yang jeut keutommah
Kon chit beumegah geular yang hebat
Meusayembara galak seulempah
Dakjeut meutamah geumeuroh adat
Loen akhe qalam warah matullah
Deungon syahadah dua kalimat
Baten ngon lahe,iseulam yang sah
Keubandum ummah,nabi muhammad
Nomor Peserta: 0007
Nama Akun fb : Bandum Bereh
Nama Asli : MIRZA
Alamat : LHOKSEUMAWE