PEMENANG SAYEMBARA PANTOEN - CAE ACEH MENYAMBUT MAULID NABI MUHAMMAD S.A.W TAHUN 2018
PEMENANG SAYEMBARA PANTOEN - CAE ACEH
- JUARA III
SIFEUT NABI
Takoh bak mamplam,keu tiang rumohKaye bak jaloh,tapeugoet rangkang
Salam alaikoem,kawoem loen satoh
Neu jaweub beu jroh,ngen mameh lisan
Saleum ukhuwah,loen ruwah punoh
Ubeut dengon groh,mandum beu saban
Moga beu sehat,nikmat bek gadoh
Yang ka geupeusoh,keunoe lam badan
Saleum horeumat,meuhat lon satoh
Ngen hate punoh,lon boeh lam talam
Keunoe loen sunyung,lam jangeun lon ploh
Sila neu mamoh,geunantoe timphan
Allah neu tudum,limpeun lam tanoh
Padum boeh rumoh,yang na lam alam
Yang brie raseuki,mulayi suboh
Yang neu peujodoh,inoeng ngen agam
Yang peujeut bumoe,han soe ek contoh
Hana meu saboh,yang soe ek lawan
Neupeujeut hamba,meu beda jumoh
Han soe yang ek ploh,peuneujeut tuhan
Ie krung yang jile,lam gle meu kuboh
Inan keuh timoh,ubi ngoen seuntang
Mandum yg peujeut,cit makbud saboh
Mangat bek meh moh,tanyoe lam alam
Purnama buleun,meulanggeum timoh
Cahya jeureuloh,indah ta pandang
Seulaweut saleum,hai imum batoh
Ngen hate punoh,akan janjongan
Doa ta gadei,lakei tiep beungoh
Oeh lheuh tabeudoh,tajak sembahyang
Moga syafaat,meuhat bek geukoh
Meuhan teugantoh,dalam jahannam
Lheuh panen pade,wase keu meukoh
Ureung meu seunoh,yak peu ek layang
Meunan keuh tamse,loen uke contoh
Mangat bek ugoh,haba lam nazam
Seumeuloeh buleun,meulageum timoh
Cahya han gadoeh,dalam supoet klam
Nyangkeuh ibarat,meuhat loen satoh
Keubit cukop jroh,panghule alam
Hana yang salah,tingkah meu saboh
Hana yg cheh choh,sifeut lam badan
Binatang nyang kleut,lam paleut tijoh
Meu seunoh seunoh,keunan teureubang
Akai peukateun,ban papeuh teu proh
Hana meu saboh,yang hana timang
Akhlak ngen budi,suci dalam roh
Hana pat contoh,ta boeh bandingan
Sifeut yang keuji,iri ngen jumoh
Mulai dalam loh,cit hana sajan
Wajah yg cantek,han ek soe yak koh
Ban bintang suboh,cahya meukeutam
Han tom lam udep,tilep seu meupoh
Keubit cukop jroh,rasul tauladan
Budi bahasa,haba that leumoh
Sinan keuh contoh,tacok pedoman
Jinoe hana le,meu cre dengon roh
Rasul teuh saboh,neuwoe bak tuhan
Sunnah neu kubah,beu pah ta satoh
Ngat bek meu pingkloh,bek salah jalan
Demi keu ummat,beu meupat uroh
Rela uleu coh,awoeh ngoen badan
Hana geu kira,kobra yak mamoh
Nyan miseu contoh,taboeh bandingan
Keubalah jasa,beuna ta tu oeh
Cara jih saboh,wahe phan nazam
Ta pubut suroeh,tuboeh beu kokoh
Hate beu teugoh,peujioh larang
Ujeun neugudhum,tam tum su kreh kroh
Meu seunoh seunoh,geu kuet pakaian
Lam seubak seubok,pacok geu peusoh
Geu plung sep dheh dhoh,lam awan itam
Haba lam mideun,keuneuweung lon ploh
Hai tengku junoh,katroek bak uram
Buhu pih ka beh,rinteh pih ka soh
Adak han meu oh,maklum hai rakan
Umu goeh useung,jangeun goh meu oeh
Tamse ban bakoh,ban jeut teureubang
Madah lam rika,haba ka loen koh
Meuah lon satoh,bak ujoeng karang
Nomor Peserta: 0040
Nama Akun fb : EL BAHRY AL HUDA
Nama Asli : SAIFUL BAHRI
Alamat :BUKET MULIA ACEH JEUMPA BIREUN
