Pantoen - Cae Aceh Akhlak Terhadap Alam
Oleh: Lisa Ulfa
Meukru seumangat rahmat ie ujeun
Ganaih musem khueng meugantoe lapak
Tanoh nyang gersang saban sare juem
Bungong siyueng-yueng luhu meukuprak
Kayee sigala nyang na lam uteun
Ka jareung-jareung jarak antar bak
Ban ujeun teuka ie raya jiplueng
Keudeh dalam krueng jile meubhak-bhak
Jitron u gampong rihon dum ureung
Meunghan geuneuk tueng tan meuho tulak
U rumoh jiék parék jeut keu lueng
Meunan sit di leun tamse water park
Susah pikiran barang meuking-keung
Manok lam umpung nafaih ka sesak
Detik keu menet met-met jarom jeum
Malot ngoen aduen gepreh tho barak
Hakikat idéh putéh ban seukeum
Ngen "kun fayakun" Lam sigra meugrak
Ka takdir Allah bicah ie lam krueng
Wab sereng ujeun asbabul mutlak
Namun andaikan saban tatunyum
Jameun keu jameun tan meunoe curak
Musem keunoeng sa tiep masa meunyum
Tapi jeut takheun ie han meujak-jak
Alam ka teulhon keuphon na ruweung
Oeh musem ujeun dumpeue meuhayak
Kayee lam rimba jinoe ka kureung
Boinah uteun abeh phak luyak
Tentee bandum nyan jampang buet ureung
Nyang han peureumeun dengon tan akhlak
Akhlak terhadap darat dengon krueng
Wajeb lam tiep jeum tangui beulagak
Sebab andaikam alam seumaluen
Geutanyoe mandum tarasa seungkak
Meuwab semena bencana tatueng
Nyang na ateuh rhueng bumoe meuhalak
Mita raseuki berangkri tampueng
Asai bek taplueng bak jalan tamak
Mita ngoen pajoh reu'oh beusadum
Meubek tataluem atra nyang ken hak
Meubek le neuplah jumlah ka kureung
Kayee lam uteun bah meunan hai pak
Takot oeh dudoe tanyoe teugageung
Hana meuho plueng inan teukeupak
Kasep keuh oeh noe lon mernoe jangeun
Golom get useung dalam meusajak
Sambe meu ulang bek gratan peudeung
Harap neumaklum hai ibu bapak