Panton - Cae Aceh Meusoe Keuh Geutanyoe
Oleh: Asna Acola
Keubiet Han payah,pakek boh thek-thok
Ngoen Kun fayakun,mandum deuh jumlah
Waloe Han leumah,meutoep ngon padok
Assalamualaikom,mula phon madah
Saleum keu sahbah,awai lon culok
Keu mandum kawon,Hana lon pilah
Sama meujatah,pijuet ngon montok
Meukru semangat,Rahmat meulimpah
Mantong na jatah,Ulee Meu cunggok
Ta syukur nikmat,meuhat tiep saah
Seugoh perintah,nyawong teuh geucok
Bakat ji'ek troen,meugulong bicah
Riyeuk meuruah,rata jeut Calok
Izin keu ulon,meuk suson kisah
Keu mangat Babah,bak tapiep rukok
Allah yang po zat,lam jagat luwah
Seugala arah,Hana teu patok
Yang maha hebat,Hana Pat bantah
Mandum perintah,Sinan Meu tunyok
Yang maha ampon,deungon pemurah
Yang maha Rahmah,seureuta elok
Dak pih meploh thon,bak hukom salah
Teutap na meuah,meunyoe tatem klok
Yang maha kaya,seugala bainah
Yang maha mewah,cuman sidroe tok
Yang peujeut Donya,lagei Nyoe ceudah
Yang peutroen nafkah,geutanyoe rok-rok
SOE KEUH GEUTANYOE,lam bumoe Allah??
Lam Donya singgah,cuman siat tok
Baro geu ujoe,lam Nanggroe mewah
Hingga jeut pongah,dada tagok-gok
Soe keuh geutanyoe,lam bumoe Allah??
Cuma seubatah,hamba Meu cabok
Oeh na rakan droe,meucawoe lidah
Han tapeu meuah,dosa beu rontok
Meusoe keuh tanyoe,lam bumoe Allah??
Baro meuhiah,pangkat be balok
Ka meurasa droe, bangga Ngoen congkah
Ngoen ureung siblah,kajak peudeuh sok
Geutanyoe hanya,hamba yang leumah
Tan lupoet salah,bak jalan bengkok
Harta ngon pangkat,siat Ji singgah
Oeh katrok jatah,ban mandum geucok
Hanya yang po hak, mutlak bak Allah
Peumilek yang sah,jeut² peulosok
Maka sadar droe,tanyoe hai sahbah
Bak mata Allah,sama kai Ngoen mok
Aneuk rampakeuh,Ateuh bak panah
Di Aneuk tiwah,jidoeng bak tukok
Eh noe keuneulheuh,tatueh lon unggah
Harap beu meuah,meupat na bengkok