HIKAYAT Aceh GANGGA PARI Nanggroe Kasmujadi II
Oleh : Irul Pujangga
Nanggroe geudong, di utara.
Yoh beulanda, prang tiep uroe.
Nanggroe bayu, pih cukop bha.
Sinan teuntra, reutoh katoe.
Masa jameun, nyan hai cuda.
Prang beulanda, deungon tanyoe.
Han neupateh, neupeureksa.
Bak ceulitra, neulop keudroe.
Bukon keunan, meuksut haba.
Pari Gangga, taneuk rampoe.
Jinoe adek, leupah gura.
Katroh buya, keunan sidroe.
Buya inong, ek udehta.
Nyan raksasa, peurupa droe.
Di peurupa, ureung tuha.
Elok rupa, cit han bagoe.
Di jak tuntut, atra lama.
Uleh raja, poh aneuk droe.
Watee neuprang, saboh kuta.
Sinan hamba, kafee pindoe.
Mate aneuk, po raksasa.
Jih di bungka, dijak beoh droe.
Bak uroe nyoe, troh di teuka.
Deungoe kana, aneuk sidroe.
Deungoe raja, aneuk kana.
Elok rupa, cahya meubhoe.
Niet jineuk poh, salim muda.
Lam astana, dikeu putroe.
Di rheum barat, pula lada.
Macam rupa, troh bak kiroe.
Bak uroe nyan, katroh teuka.
Bak astana, ka dipeutoe.
Dijak laju, hana haba.
Ubak raja, dipeulheuh droe.
Oh ban sare, troh di teuka.
Hormat jiba, jibeot jaroe.
Ampon patek, hamba hina.
Rumoh hana, angen tampoe.
Harap gaseh, bak meukuta.
Neutueng hamba, namiet sinoe.
Aneuk saboh, manyak raya.
Gaseh hana, tan ayah droe.
Uleh seubab, hai meukuta.
Neutueng hamba, bak uroe nyoe.
Hudep mate, seurah lon ka.
Bak meukuta, lon pujok droe.
Miseu salah, nariet hamba.
Neupeupana, tuboh lon nyoe.
Raja deungoe, seunyum teuka.
Maneh haba, bak inong nyoe.
Bah ulon cok, namiet kuta.
Wayang seunda, keu aneuk droe.
Teuka titah, raja sigra.
Ureung tuha, pat bu nanggroe.
Teoh halaman, naduek desa.
Kiban teuka katroh keunoe.
Teuma jaweub, inong tuha.
Jioh kuta, tuan ku droe.
Rintang laot, deungon rimba.
Niet lam dada, beutroh keunoe.
Dan lom raja, jatoh sabda.
Jinoe cuda, niet rumoh droe.
Lon na aneuk, sidroe saja.
Neupeularha, ban aneuk droe.
Peurmaisuri, dalam tika.
Gohlom bisa, peumom keudroe.
Manteong saket, dum anggeta.
Aleh peuka, hom hai ma droe.
Ban neudeungoe, haba raja.
Leupie dada, kafe pindoe.
Sang karab troh, yang di damba.
Dakjeut sigra, beuditampoe.
Angen laot, poet that teuga.
U kuala, riyeuk tampoe.
Tan teupike, nyan raksasa.
Ureung tuha, yang deuh sidroe.
Bak masa nyan, geupeucaya.
Uleh raja, buya tampoe.
Ka geuhoi le, bak nyan sigra.
Meuntroe BAKA, utoh han soe.
Bantroh meuntroe, hormat sigra.
Ampon hamba, bak uroe nyoe.
Peuna pakat, poe teuraja.
Bak nyoe sigra, neupeusampoe.
Teuma seuoet, poe teuraja.
Pakat raya, wahe meuntroe.
Nyompat sidroe, ureung tuha.
Jak leh taba, nibak putroe.
Tapeutamong, keudeh sigra.
Bajee ija, ta yue gantoe.
Lheuh nyan keudeh, tapeugisa.
Dalam kama, bak samlakoe.
Ban neudeungoe, titah raja.
Beudoh sigra, teuma meuntroe.
Ka neupeubuet, ban yang sabda.
Hana cupa, peulom paloe.
Teuma meuntroe, chok keunira.
Ureung tuha, sang meupaloe.
Bak sang rayeok, katroh bala.
Ajeb raya, teungku meuntroe.
Adak meunan, kheun lam dada.
Dalam saba, tuan meuntroe.
Han neupeugah, nibak raja.
Takot gura, eunteuk kachoe.
Peugot timphan, uroe raya.
Lheuh puasa, adat lampoe.
Lon balek a, jinoe sigra.
Meunan cit ka, lon peulheuh oe.
Aneuk bruek bruek, gaki patah.
Di jak siblah, dalam paya.
Meuntroe baka, lheuh nyan susah.
Neuwoe bagah, bak astana.
Troh u rumoh, lam geulisah.
Apoh apah, hana ngon sa.
Ka teupike, masa alah.
Akan keubah, ureung tuha.
Timoh pike, tulong Allah.
Ingat teulah, saboh masa.
Ingat nujum, yoh phon jeulah.
Teuntang kisah, aneuk raja.
Nyoe sang katroh, lahe jeulah.
Nujum pantah, yang ceurita.
Adak meunan, beu ek leupah.
Neuk meutuwah, beu bahgia.
Teuduek meuntroe, lam geulisah.
Bah lon ubah, u astana.
Han geot rupa, meunoe olah.
Dak ta bahah, hana guna.
Bak si uroe, peut cit ka sah.
Aneuk mirah, moe that raya.
Tuan putroe, ka geulisah.
Peu masalah, katroh teuka.
Teuma raja, pih lam gundah.
Oya Allah, peuna bala.
Pakon aneuk, beukah babah.
Hanpre saah, klik that ruga.
Bak nyan masa, troh langkah.
Neu ek bagah, ureung tuha.
Neucok aneuk, ka neumeushah.
Singap bagah, aneuk raja.
Han le karu, bintang peut blah.
Hate ayah, seunang pih ka.
Peurmaisuri, han le gundah.
Kana soe cah, bungong jeumpa.
Lheuh teujadi, bak nyan saah.
Aneuk mirah, han meuhoe ka.
Tanle aneuk, bak keuneubah.
Oya Allah, peulom bala.
Putroe neuklik, babah teuhah.
Apoh apah, beberaya.
Raja deungoe, neuplueng bagah.
Teudong langkah, troh lam kama.
Neutanyoe pue, bintang ceudah.
Pakon ulah, moe that ruga.
Peuhan lon moe, lon ka susah.
Aneuk mirah, han meuhoe ka.
Ban neudeungoe, raja rubah.
Gadeoh nafah, poe teu raja.
Di dendayang, jiplueng bagah.
Oh ban reubah, di mat sigra.
Ngon jibeudoh, dicok ngon glah.
Ie di tumpah, ateuh raja.
Ka teukeujot, doli ayah.
Klik meu hah hah, keumong mata.
Teuma troh le, meuntro gagah.
Eu barollah, beh peu nyoe ka.
Neusudi le, peumasalah.
Habeh surah, seudeh raya.
Beudoh meuntroe, teuntra geukrah.
Rakyat sudah, geuhoi sigra.
Oh sare troh, di meulangkah.
Peutron titah, bak nyan masa.
Bak nyoe uroe, ngoe lon peugah.
Bak awak kah, lam astana.
Aneuk raja, kagob pinah.
Sang di reupah, le .. Ureung tuha.
Beudoh siteot, jinoe bagah.
Tameulangkah, laot rimba.
Han meurumpok, beutailah.
Meuhan pantah, kah ku suda.
Ban rakyat ngoe, nyan peurintah.
Beudoh bagah, tanle haba.
Hate seudeh, ngon geulisah.
Muka mirah, hu ngon mata.
Dijak seutot, buleun peut blah.
Dum barollah, rakyat teuka.
Keunoe di jak, keudeh di shah.
Pokok nyoe sah, han meutuka.
Krue seumangat, pucok nipah.
Ujong reubah, ka meusuda.
Krue seumangat, raja susah.
Lam jeut saah, katroh bala.
Kheundak nibak, Poe teuh Allah.
Meu ube drah, han meutuka.
Ka geu uji, raja meugah.
Putroe ceudah, pih nyan sama.
Teuma dudoe, tron lom titah.
Neuyue langkah, nujum sigra.
Nibak jeum nyoe, beukeuh kumah.
Ulon susah, han ek kira.
Haba yang toe, ulon peugah.
Nujum ka sah, troh pih teuka.
U bak balee, neumeulangkah.
Tanyoeng titah, nibak raja.
Tuan raja, kaneupeugah.
Abeh surah, ban laku nya.
Hana cupa, meudubedrah.
Hana salah, satu apa.
Neujum deungoe, ka geulisah.
Neucok bagah, kitab mantra.
Neubuka le, baknyan saah.
Neumeurajah, beuseumpurna.
Lumboi siploh, ngon limong blah.
Nibak peut blah, deungon dua.
Ka neupeupoek, meuhoe surah.
Neutob bagah, rahob muka.
Teuma nujum, beuot seumah.
Meubek gundah, hai meukuta.
Jroh samlakoe, lindong Allah.
Ka meuminah, jeuoh that ka.
Meuyang cok jih, ureung langkah.
Lam lungkee sah, ureung tuha.
Keurna dijih, jak tueng balah.
Atra leupah, yoh prang jala.
Teuma nujum, beuoet seumah.
Neubeot langkah, neuwoe sigra.
Poe teu raja, teutap susah.
Aneuk lidah, cit kagob ba.
Alah aneuk, manyak mirah.
Tatem minah, gata dinda.
Tajak gata, tinggai ayah.
Padum susah, bijeh mata.
Bu lon pajoh, sang han leupah.
Rasa lon grah, kon ie saja.
Tapi aneuk, meuchen leupah.
Aneuk ayah, han meuhoe ka.
Eungkot bace, ka jimeulhoe.
Yang meupaloe, si eungkot tri.
Allah tuboh, nyoe ka paloe.
Sang meucawoe, bak nyoe rawi.
Lon paban bah, karamg keudroe.
Leh seuleusoe, aleh hanyi.
Keurna ilmee, han that bakoe.
Atra lampoe, kureung ngerti.
Adak meunan, lon ilah lhoe.
Beu ek sampoe, tuhan neubri.
Beurkat adam, nyompat cucoe.
Hawa putroe, entu nini.
Lhok krueng awe, jinoe kadhoe.
Kon saboh roe, cit leo that ie.
Meuwoe haba, ureung sagoe.
Ubak meuntroe, ngon keurani.
Deungon teuntra,langkah geujhoe.
Adak duroe, han geuasi.
Adak lintah, jikap asoe.
Anggap bak dhoe, jiduek pehmie.
Ta eu teuntra, salle waloe.
Rakyat pih bhoe, han peu kheun kri.
Yang di laot, saboh bagoe.
Abeh sigoe, jigrob lam ie.
Na lheung geujak, sithon tempoe.
Ngon samlakoe, tan leumah ri.
Beudoh teuma, laju geuwoe.
Keudeh nanggroe, kasmajadi.
Takoh awe, lam gle kiroe.
Yang koh jathoe, indrapuri.
Jinoe haba, ulon peutoe.
Keu samlakoe, lon peugah kri.
Lawet di cok, kafe pindoe.
Nyoe samlakoe, ditiek lam ie.
Dalam laot, ribot tuloe.
Ka dibapoe, ula ili.
Kheundak Allah, kudrat sampoe.
Troh tanggiroe, jicok bayi.
Dibeot laju, ka dipuwoe.
Keudeh sampoe, ateung pasi.
Ka dipeulheuh, muda samlakoe...
Nibak puloe, brahman sakti.
Puloe nyan nan, hai aduen droe.
Yang keuh nanggroe, purbajati.
Purbajati, nama nanggroe.
Raja sidro, brahman sakti.
Jen ngon mambang, taklok pih toe.
Aduen adoe, deungon pari.
Jeuneh insan, tan meusidroe.
Han troh tapeo, ribee hari.
Meuyang troh hak, Allah sidroe
Laen han soe, hanpeu ungki.
Teungku brahman, bak nyan dudoe.
Teungoh laloe, geuseumedi.
Deungon murit, meureutoh droe.
Sinan cit toe, deungon duli.
Bak duek tapa, teungku peudoe.
Deuh samlakoe, bineh pasi.
Deuh neukaleon, dalam lumpoe.
Meuwoe asoe, deuh ngon sakti.
Beudeoh brahman, sigat geupeo.
Troh le sampoe, bineh pasi.
Neujak laju, dalam uroe.
Tan geupakoe, reuoh hanyi.
Yang geusitot, cit samlakoe.
Pat du sidroe, ka geucari.
Dari jeuoh, leumah meubhoe.
Cahya kiloe, leupah tari.
Cahya leumah, trang han bagoe.
Sang ka sampoe, naksu hati.
Geujak laju, tan neupakoe.
Hingga dudoe, ka deuh dali.
Ban neukaleon, taheo keudroe.
Maneh tuloe, pirak beusi.
Ngon ie muka, jroh han bagoe.
Tamse uroe, pagi hari.
Lheuh nyan neucok, ka neupuwoe.
Nyan samlakoe, cut that lagi.
Keudeh neuba, lam meuligoe.
Galak tuloe, brahman sakti.
Teuma neuba, u seuramoe.
Tanglong nanggroe, keu seumandi.
Neuhoi dudoe, teuma meudroe.
Yue mat keudroe, peurmaisuri.
Peurmaisuri, brahman adoe.
Nan that meuboe, kuntom wangi.
Cut kasumma, that keumiloe.
Tan meusidroe, buah hati.
Bak uroe nyan, galak tuloe.
Sang troh tumpoe, lam tabeusi.
Neu eu rupa, jroh han bagoe.
Lam jeut nanggroe, tan sama hi.
Neucok neucom, bintang peudoe.
Alah hai soe, seunang han kri.
Teuma mariet, po cut putroe.
Neuteuoeh soe, budak ini.
Brahman jaweub, hai sambinoe.
Nyoe samlakoe, kasmujadi.
Nanggroe meugah, geuthat bakoe.
Keunan meuwoe, pangkat tinggi.
Neuk sulotan, nyan hai adoe.
Jicok dudoe, le geugasi.
Keurna beungeh, payong nanggroe.
Jeut keuh meunoe, nyan teujadi.
Blang meurandeh, ureung meumpoe.
Pula kiroe, samahuni.
Kheundak Allah, aduen adoe.
Rayeok jinooe, bintang pari.
Haba yang rab, ulon rampoe.
Poe samlakoe, umu meuhi.
Sinan udep, rok rok uroe.
Sajan putroe, brahman sakti.
Ka neu aja, poe samlakoe.
Prang ngon cakcoe, rijang meuri.
Neu ek guda, pih ka bagoe.
Laen dudoe, leungkap lagi.
Peungeuh hate, poe samlakoe.
Hana yang roe, geuajari.
Bandum keumah, hase dudoe.
Hayeu tuloe, hansoe ungki.
Miseu pade, bijeh mawoe.
Cit ka diwoe, bee that wangi.
Miseu pade, lilen asoe.
Breuh meuduroe, mangat hanri.
Meunan cit lom, payong nanggroe.
Aneuk musoe, nyan geutadi.
Aneuk raja, areh tuloe.
Ka meubudhoe, jeub jeub neugri.
Tulheuh leungkap, bandum asoe.
Neuhoi jinoe, brahman sakti.
Neuhoi aneuk, muda samlakoe...
Yang jroh beudoe, leupah sakti.
Jinoe aneuk, nan lon gantoe.
Hai aneuk droe, GANGGA PARI.
Nyan hai aneuk, payong nanggroe.
Ka lon gantoe, nan nyan rasi.
Jinoe aneuk, katroh uroe.
Umu sampoe, grak ilahi.
Gata aneuk, beutatusoe.
Aneuk nanggroe, kasmujadi.
Nyan keuh ayah, hai aneuk droe.
Beudoh jak woe, jak meuturi.
Keurna gata, jeut troh keunoe.
Buet bak jaroe, nyan geugasi.
Roe ie mata, ban neudeungoe.
Leupie asoe, gangga pari.
Dak jeut beuka, lheuh geu ungkhoe.
Biek kafe nyoe, si gegasi.
Titah brahman, teuma bak toe.
Hai aneuk droe, deungoe kami.
Nyompat peudeung, lon peujaroe.
Keubai beudoe, lhuet sigoe sie.
Jen ngon mambang, diwa pih jhoe.
Cit seb sigoe, nyoe tataki.
Hana dithee, dak beurangsoe.
Le peudeung nyoe, diwa pari.
Nyompat na lom, cumboi ragoe.
Cok tawoe, gangga pari.
Leo that hikmat, jih di sinoe.
Raja peut droe, di meubakti.
Raja hai neuk, aduen adoe.
Sakti tuloe, lon peugah kri.
Jampang peurlee, dumbek sigoe.
Leumah gigoe, deong meuriti.
Lon ato nan, jih sidroe.
Phon nan juhoe, ugah han ri.
Rakna hikmat, dua dudoe.
Lhei syah daloe, keubai beusi.
Peut aman lah, nyan keuh adoe.
Hai aneuk droe, leubeh sakti.
Buet jih hase, dalam jeum nyoe.
Kafe pindoe, laju mati.
Abeh titah, brahman ragoe.
Di samlakoe, teubit lagi.
Neujok euncin, lom pih dudoe.
Intan peudoe, namrut asli.
Euncien nyoe neuk, kasiet lon preo.
Jeut meuligoe, meuheut hati.
Tatiek laju, nibak jaroe.
Sigrak dudoe, peunoh isi.
Hana payah, jak eu nanggroe.
Cit jeut keudroe, siklep hari.
Hase bandum, lheuh neurampoe.
Muda samlakoe,,,neucom gaki.
Seumah brahman, nyan ayah droe.
Beudoh neupeo, deungon pari.
Heundak neujak, woe bak du droe.
Saboh uroe, tipee geugasi....
Bersambung