HIKAYAT ACEH Fadhilah 99 ASMAUL HUSNA
SIGLI 15 DESEMBER 2018 UH-AL
Laoet yang raya meuhalak indah
Peuneujeut Allah Wahee syedara
Kaya Ngoen hase Allah peuleumah
Rame dum sahbah sinan keurija
Salam alaikom bak phoen phoen kisah
Saleum lam madah keu rakan dumna
Izin loen rinteh bareh Ngoen surah
Teuntang fadhilah Asmaul Husna
NA Lhee ribee nama yang cukop indah
Cukop that meugah Wahee syedara
Teuman yang wajeb ta turi allah
Nan lam kisah sireutoh kurueng sa(99)
Teuman yang keu phon ALLAHU ALLAH
Dijih fadhilah raya leumpah na.
meu Peu meukeusut loen peutroh bagah
Rakan Meutuah Watee lam sigra.
RAHMAN keu dua peungaseh mudah
Teunang han gundah bak sifeut lupa.
RAHIM saudara keu lhee loen peusah
Lawan yang gagah di yoe keu gata.
Gaseh Ngoen sayang cinta that lillah.
Wahee Meutuah faedah loem na.
Lheuh nyan yang keu peut Menoe loen peugah
MALIKU sahbah geupeunan ASMA
Peu Peu ta pubuet meutumee beurkah
Meu untong leupah ta amai sigra.
QUDDUS yang suci Peu manja lidah
Ngoen insya allah peunyaket FanA.
NUHUSSALAMU dum that fadhilah
Seulamat ceudah bak mara bahya.
Sabe bahgia hudep tan sosah
Adak musibah geupinah sigra.
Keu lapan MUKMIN chiet nama Allah
Teuntram han gundah soe yang tem baca.
A'ZIZ sikureung Tuhan yang Gagah
Geutulong bagah geu peumulia.
Nama JABBARU Peu kayeem leupah.
Rangkajan sahbah Menyoe na masa.
Ubeena musoh dak panyang peut hah.
Rasa sang reubah di lawan gata.
Geu cipta KHALIQ nama poe tallah.
Ngoen insyaallah mufhom lam sigra.
Caroeng seumike ulee teuh ceurdah
Chiet Mandum jeulah bee na peukara.
ALBARI-U teuman yang keu lhee blah.
Ngoen izin allah han sukar gata.
Menyoe lam hudep murumpok susah.
Atasi bagah uleh rabbana.
Yang goh na sinyak Aneuk meutuah
Katreb meunikah kalheuh useuha.
Lajue neu wirid baca bak lidah
Asma keu peut blah ALMUSHAWWIRA
maha Peu ampon AL GHAFFARULLAH
dosa Ngoen allah geu sampoh lanja.
Ubeena dausa jinoe Ngoen leupah
Yang han geupinah dausa Ngoen hamba.
Menyoe AL QAHHAR rayeuk fadhilah.
Dingoe hai sahbah uloen boh rika.
Allah neujaga hate Meutuah.
Peulara sahbah bak sifeut donya.
Di sampeng meunan neubri lee allah
Di seugan bagah buet makhluk fana.
Inoeng Ngoen agam haba han leupah
Chiet hana bantah atoran gata.
bacuet ta cukeh di weh ngoen leugat.
Di jak that lambat meu ganggu hana.
Meunyan keuh cangguk Wahee ee sahabat.
Uloen ibarat bak teungoh rika.
(geulantoe istirahat)
Ta sambong jinoe haba naseuhat.
Beujeut keu rahmat meung soe tem baca.
Teuman tujoh blah nan geuh AL WAHHAB
Tiep tiep lheuh shalat beu tatem baca
Raya fadhilah keunan meusapat
Hudep meularat geu gantoe teuma
Seulamat hudep meutumee nikmat
Gasien han sahbat si umu masa
ARRAZZAQ teungku nama hadharat
Rizki mudah that Peu Peu useuha.
Adak geu cawoe ie lam ploek ubat
Teutap mendapat untong loem laba.
Menyoe YA FATTAH dingoe loen rambat.
Rawi loen radat hate meucahya.
Teuma na cara ta amai sahbat.
Loen bi hikeumat oh dudoe teuma
Allah YA A'LIM maha teupue that
Sidom dan lalat seugala bangsa.
Teuma na leubeh dijih fadhilat
Ilfu makrifat bagah seumpurna.
YaQABIDHULLAH waya muhammad
Geubrie Seulamat tiep tiep di caba..(ancaman)
Dua Ploeh dua asma hadharat.
BASHITHU meu lhat dalam useuha.
Cukop that reumbang keu ureung meukat.
Laba meulipat meu ganda ganda.
Sabe meu untong tulong han seusat.
Allah hadharat cukop peurkasa.
Nuhul KHAFIDHU peurhot deurajat.
Chiet hana lambat neu qabol sigra.
Peu yang neu lakee gadee hay sahbat
bagah cukop that allah teurima
NUHURRAFI'U PEU ek derajat
Allah Peu ek that deurajat gata.
Allah geu jaga harta martabat.
Gata hai sahbat siapa saja.
Dua ploh limonng jinoe lam radat.
Nama meugah that ya ALMU'IZZA
Nyoe ta tem amai allah boeh pangkat.
Lam masyarakat that meuwibawa.
Nuhul MUDZILLU makna yang rapat.
Wahee ee sahbat perlee di gata.
Susah meu tungge rakan yang akrab.
Utang meukumat ji peuglah lanja.
waya SAMI'U. Di dalam kitab.
Doa mustajab rizki teuh kaffa.
Teuma ya BASHIR oh lheuh jumeu'at
Allah Peu kumat ilmee ladduna
Hatee meucahya lidah berucap.
Sabe ta dapat nikmat rabbana.
Hidayah allah hana meukulat.
Meunan chiet laknat teutap akan na.
Tatem ibadah pubut Ngoen taat.
Pujoe hadharat sabe tiep masa.
Nyoe uloen peugah beuna manfaat.
Beu jeut keu ubat juga peunawa.
yang uloen rika asoe hikayat.
Di dalam kitab asai loen maba.
Nyoe han neu pateh mubek neu debat.
Nyoe pat na kitab kuat Ngoen Fakta
Alhamdulillah keu rahmat tuhan.
Dalam meukalam mantong kuasa.
Mantong na sihat tubeoh Ngoen badan.
Mandum fikiran juga anggota.
Teuma ta sambong rika tulesan
Asoe di dalam asmaul husna.
Dua sikureung allah ya HAKAM.
allah bri jalan ilmee agama.
Bagah that caroeng ateuh ajaran.
Bagah putoh fham Watee beulaja.
Allah YA A'DLU ade hana ban.
Na keuleubihan dingoe syedara.
Peu Peu yang ta niet tanyoe jalankan.
Bagah teucapai Ngoen teu laksana.
Nyoe jeut keu hakim ade hana ban.
Karoenya tuhan Azawajalla.
Siblah dua ploh ta sama dengan (11+20=)
Lhee sa(31) hai rakan jumlah keulua.
Tuhan YA LATIF leumbuet that sayang.
Uroe Ngoen malam cukop ta rasa.
Hana yang kureung yang leubeh pih han.
Nyoe ta amaikan asma keu lhee sa
NUHUL KHABIRU teuma sambongan.
Leubeh lee tuhan Seulamat gata.
Teuma yang laen fadhilah sinan.
Meurumpok rijang Ngoen rakan lama.
Allah YA HALIM teuma oh lheuh nyan
han soe ek kuran jabatan gata.
Han ek di tunggeng di pangke pih han.
Sang sang meulabang posisi gata.
Teutap di gata pangkat teuh aman.
Han ek soe goyang khendak rabbana.(nyoe cocok keu pemimpin yang ade)
YA AL'ADHIMU agoeng that tuhan.
Allah ya rabban Peu puleh sigra.
Meungsoe na saket katreb hana ban.
Ngoen kehendak tuhan lan siklep mata.
NUHUL GHAFURU ampon loem sinan.
'ALIYYU manyang faedah teuma.
Kadang na Aneuk bangai that simban.
Ulee sang itam hana wareuna.
Neukheun ALIYYU neu tuleh rijang.
Dan na loem jalan pakiban cara.
Menyoe neuk tupue inbok neu layang.
Saleum mulaan keu modal haba.(jeut neu inbok loen meunyoe neuk tupue kiban cara amai)
NUHUL KABIRU Menyoe suratan.
Kadang na rakan difitnah haba.
ngoen Seubab fitnah gadoeh kerjaan.
Kadang chiet kadang ka di P-H-Ka.
Allah brie leubeh geugantoe lheuhnyan.
Nyoe ta amaikan KABIRU asma.
Allah neu jaga langkah ta layang.
Peu jioh rijang mara bahaya.
Nyan keuh fadhilah nan ALHAFIDHAN
Wahee dum taulan yang that mulia.
Geunap keu peut ploeh loen boeh suratan.
Di minyub labang papeun Ngoen baja.
NUHUL MUQITU memberi makan.
Makna lam reugam meunan seudia.
Kadang chiet sisat mita jeureunang
Kadang tan beukai di dalam rimba.
Allah brie puleh brie kekuatan.
Gagah hana ban cukop that teuga.
Sang sang saboh them keju lam cawan.
Meunan sang nyum ban teuga peukasa.
-------------
Leupah that sayang si cabeung panjoe.
Di toet le uroe angen Peu patah.
jinoe ta sambong kawoem lam rampoe.
nak mangat asoe baca faedah.
Yang ka u likoet peut ploeh (40) ka sampoe
Lakee nibak poe meusahoe rahmah.
NUHUL HASIBU teuga han bagoe.
Tuhan yang sidroe han ek soe teugah.
Tuhan bie hase sabe tiep uroe
Sampoe geutanyoe jabatan meugah.
nyoe AL JALILU seuboet haretoe
Keu ureung lhe droe allah brie mudah.
Peuphoen peutani meu gle Ngoen meugoe
Useuha sampoe dak reuoh reuah
Teuma keu dua peujabat nangroe.
Pangkat meusahoe dan lagi meugah.
Ureung yang keu lhee Wahee rakan droe.
Hana toem rugoe peudagang sahbah.
Bagah that maju oh saban uroe.
Saingan han toe lagi han susah.
WA YA KARIMU allah geukheun droe.
Arti that meuhoe maha yang murah.
Beu ta tem baca malam Ngoen uroe.
Hitongan sampoe lhee reutoh beu pah.
Teuma faedah allah brie jinoe.
Troh raja nagroe di Seugan gata.
Meuah bohate buhu loen gilhoe.
Bak teungoh rampoe ujoeng loen puta.
Meunan budaya waya samlakoe.
Aneuk Ngoen binoe adat ta jaga.
Qanun Ngoen reusam sama ta hiroe.
Bek meuchangkoloe bak akhe masa.
NUHURRAQIBU balad lam bumoe.
Tuhan geutanyoe geu jaga gata.
Menyoe di abang geujak meurantoe.
Uluwa nanggroe u malaysia.
Sabe geubaca beu troh siblah goe
Aneuk Ngoen binoe allah yang jaga.
Teutap Seulamat hana meupaloe.
dalam rumoh droe rugoe han teuma.
Allah YA MUJIB doa Peu sampoe.
Malam Ngoen uroe yang tem tem mita.
NUHUL WASI'U luah han bagoe.
sulet hudep nyoe bagah na cara.
jioeh Ngoen deungki irie hate nyoe.
Keu hamba yang toe deungoen rabbana.
NUHUL HAKIMU bijak tuhan nyoe.
Cocok asma nyoe keu santri muda.
Bagi peulaja malam Ngoen uroe.
Ulee Aneuk nyoe caroeng leumpah na.
Teuga ingatan kuat jaga droe.
Sep pah hai binoe keu Aneuk gata.
Teuma yang jinoe asma tuhan droe
indah han bagoe dingoe loen khaba.
Nyoe na Peu rumoh Wahee samlakoe.
Cinta di binoe sidroe chiet gata.
Seutulus hate sabe di hiroe.
Cinta gata nyoe han dipeu dua.
NUHUL WADUDU nama yang sampoe.
Nyan keuh rakan faedah asma.
Doa peungaseh nyoepat di yub nyoe.
Bek salah gilhoe sihee ta guna.
Nuhul MAJIDU ta yub bak jaroe.
Ta sampoh bak dhoe beutroh bak muka.
Ngoen insyaallah tuhan peusampoe.
Taulan lam nagroe juga saudara.
Gata di sayang malam Ngoen uroe.
Cinta meu uboe meu ukheu Dama.
NUHUL BA'ITSU uloen hareutoe.
Neu pruh bak jaroe peuduk bak dada.
Teunte allah brie macam dum bagoe.
Hikmah that sampoe ileumee rabba.
Menyoe ASYSYAHID loen kutiep tumpoe.
Dalam kitab nyoe meunoe afdhala.
Menyoe na Aneuk akai meupaloe
Han di tem dingoe ayah ngoen poma.
Hudep jih bebah ka lagee lumoe.
Gaul han bagoe tee taeu nyata.
Bagah neu baca asma tuhan nyoe.
Syarat dijih nyoe laen loen rika.
(Menyoe perlee jeut neu inbok)
NUHU AL HAQQU peu butoi rampoe.
Narit lidah nyoe iman teu jaga.
Taat keu hukom bak peurintah poe.
Islam meusiboe lam dada gata.
ALLAH WAKILU wate lam nanggroe.
Haru hara nyoe han tume rasa.
Angen ngoen topan dan geumpa bumoe.
Han rusak nangroe bagah loem reuda.
Ta sambong jinoe Wahee ee rakan.
Nuhul QAWIYYAN jallalu jala.
Limoeng peut sudah asma di tuhan.
Khalikul alam peneujeut donya
Sinan meurumpok keu daya tahan.
Tujoh seuimbang han bagah tuha.
Leumoh Ngoen basoe beuo malasan.
Bak gata intan han sagai baqa.(keukai)
NUHUL MATINU Peu teugoh insan.
Soe yang tem amai teuga leumpah na.
Meusoe yang dakwa hana seu imbang.
Raya that badan meusahoe teuga.
NUHUL WALIYU peulindong tuhan.
Keukai jabatan sabe kau gata.
Soe keu meuk hancoe han ek di goyang.
Dak meu rangkaban rang ka krie cara.
NUHUL HAMIDU pujoe ya rabban.
Bak dua tangan ta yub lee sigra.
Lheuhnyan ta gusuk muka beu rijang
Allah peudeuh trang buleun sang cahya.
That Muraqabah hamba Ngoen tuhan
Taat di gobyan sidroe rabbana.
Nyan keuh faedah dan kelebihan.
ALMUHSI asman tuhan brie nama.
Meungsoe keuh hamba na peukeurjaan.
Peunteng hana ban bandengan hana.
Nyoe ge tem amai serta geu mulai.
Asma ya tuhan MUBDI-U sigra.
Teuma nyoe haba kadang biet mumang.
Rab salah jalan ragu lee gata.
Teuma syok sangka laen fikiran.
Peutunyok jalan buet AL MU'IDA.
NUHUL MUHYI-I MUMITU keunan.
Sigoe hay taulan uloen boh makna.
Allah peujioh seugala macam.
Peunyaket badan fikiran teuma.
Kadang politik atau peudagang.
Merasa beban ancaman teuma.
Lajue lee sigra geu baca nyohnyan.
Laju geu amai MUMITU asma.
Menyoe ka geu kheun uroe Ngoen malam.
HAYYU YA QAYYAM lee sidroe hamba.
Hudep that mudah allah brie jalan.
Lheuh nyan di seugan dan loem di cinta
Han bagah keunong ujoeng rayuan.
Teugoeh that badan cukop seumpurna.
Hate that kuat koeng pendirian.
Han ek di sumbang peuseusat kanda.
NUHUL MAJIDU nyan keuleubihan.
WAJIDU rakan dingoe loen rika.
bak amai asma Tamah syaratan
bagah hai taulan aneuk shaleha.
NUHUS SHAMADU QADIRU Lheuh nyan.
Saba lam badan geu tamah sigra.
Adak cukop brat ubat tantangan.
Yang hawa intan bagah geu ridha.
ALMUQTADIRU fardhu seumbahyang
Baca oh lheuh nyan MUQADDIM teuma.
Bagah mutumee hajat si insan.
Allah brie jalan mudah useuha.
AL MUAKH_KHIRU guru akheran.
Taat keu tuhan gairah that rasa.
NUHUL AWWALU faedah saban.
Sigra lee tuhan geu qabul doa.
Etnoe ta kubah faedah pesan.
loen jak seumbahyang nyoe karab 'asa
Nyoe mantong umur neubrie lee tuhan
oh lheuh seumbahyang leon samboeng teuma.
Ka putoh janji dum aneuk adam.
Mohon maafkan tulus lam dada.
Seubab ka janji habeh karangan.
Jalla al azwan beu seuhat dumna.
---------
Loen pujoe allah meugah lam mideun.
Hanjeut keu hireun Peu karunia.
Ta samboeng teuma NUHUL AKHIRUN.
meu soe yang tem kheun gobnyan han papa.
Teuma 'oh lheuh nyan NUHUDH_DHAHIRUN.
beu sabe seu um lam tuboeh gata
Sabee ta baca wudhuk beu ta tueng.
Allah geu suleung Peu yang ta hawa.
NUHUL BATHINU laju loen sunyung.
Adak lam ruhueng leumah bak gata.
Mandum rahsia kanda meuteumeung.
Ban peungeuh buleun leumah bak dinda.
NUHU AL WALI Ngoen MUTA 'ALLIYUN.
Han suah reunyeun hajat saudara.
Keuneuk meurumpok peujabat mideun.
Sang sang puteh pleun di kaloen gata.
NUHU AL BARRU geutanyoe ta um.
Allah peuglah nyum doa sineuna
Dausa teuh ampon langsoeng ban Mandum.(kaet dausa ngoen allah)
ATTAWWAB takheun taubat nasuha.
Meung soe meuhajat musoh neuk tinteung.
Tika bek taleung dalam beuranda.
Dalam seuramoe MUNTAQIM neu kheun.
Allah peuteumun troeh hajat gata
Cukop that nikmat gaseh rambideun.
Sayang meutumeung dari rabbana.
Allah yang esa syara lam reuweung.
Sabee lam balum cinta keu gata.
Laju neu amai asma AFFUWWUN.
RAFURUR RAFUR RAUF loem asma.
Allah brie sigra wibawa lam lueng.
dak Mandum ureung Seubab keu hamba.
lapan peut jadeh sareh that surah.
Jinoe loen peugah lagee bak tema.
NUHUL MALIKU MULKI loem teuhah.
Han mudah goyah pangkat saudara.
Teuseunyoem teukhem soe soe yang leumah.
Buhu meu ubah bak teungoeh haba.
Ka lazem malzum meunan lam madah.
Kadang that susah peusahoe kata.
Yang lapan limoeng loen seumoeng loen prah.
Haba lam surah meunoe loen rika.
ASMA ZU JALAL lagi IKRAMAH
Ngoen insyaallah hajat seumpurna.
NUHUL MUQSITHU lajue loen surah
Ngoen izin allah adee that hamba.
Cukop that peunteng pemimpin yang sah.
Malem dan meugah yang mat kuasa.
Dum soe jeut baca(dingoe) nak meuhoe surah.
Bek gadoeh peugah manfaat hana.
Ladoem lam mideun geukheun kheun allah.
Kadang bak babah bak hate hana.
Rugie that rugoe masa hai ayah.
Meunyoe lam salah malam Ngoen seunja.
Han ek ta tukri han neu tem taubah.
Sajan sa'labah di yaumil mahsya.
Menyoe na amai ta amai bagah.
Ilme bak dayah yang ka neu mita.
Bek rugoe jameun kheun Aneuk dayah.
ka hana shalah(seumbahyang) ban troh u luwa.
meuNyoe ileumee faham lam surah.
Tapi di sahbah ta amai hana.
Cukop that sayang nanggroe akhirah.
geutoet that bagah dalam nuraka.
Gata Ngoen nek 'un(fir'un) qarun yang meugah.
Abang sya'labah lahab Ngoen jaha(jahai)
Awai geutanyoe lagee lam surah.
Nuraka theun rah apui menyala.
Allah ya allah allah ya rahman.
Khalikul mannan azawa jalla.
Uloen pujoe poe sidroe ya rabban.
Keu muhammadan seulaweut lanja.
Keu lapan tujoh asma lam nazam.
Hikayat reupang caee lam rika.
Sambongan bunoe keunoe loen peutrang
Wahee dum rakan asmaul husna.
NUHUL JAMI'U Bak awai kalam.
Ta puwoe pulang lam rumoh tangga.
Meng soe meu yang plueng hana khabaran.
Ngoen izin tuhan bagah di gisa.
Nyoe AL GHANIYYU kaya hana ban.
Langet lam alam tuhan yang punya.
Meunan chiet geubrie keu sidroe insan.
Kaya laju ban baroe useuha.
Menyoe lam rumoh di meu kap muprang.
Cupe Ngoen cawan di meu khok teuma.
Lakoe Ngoen binoe ka salah faham.
Cekcok di abang Ngoen ma sidara.
Laju neu amai Wahee dex intan.
NUHUL MANI'AN oh malam jula.
NUHU AD DHARRU MANI'U lheuh nyan.
Penyaket dalam yang katreb masa.
Lajue ka puleh jeut geu maen bhan.
Karoenya tuhan han ek ta sangga.
NUHU AN NURU cahaya rabban.
Mulia tuhan cukop meucahya.
Peugah mulia gata hai taulan.
Di donya saban akhirat juga.
Hana meupadoek geet that meu labang.
Han bagah leukang Adak di goega.
NUHUL HADIYYU NUHUL HADIyan.
Peutunyoek insan kalam rabbana.
Hana geutanyoe seusat lam jurang.
Jioh lam peukan maksiet teujaga.
Nurul BADI'U Allah ya rahman.
rahmat that simban Peu yang tahawa.
Asai bek salah meu balek jalan.
Allah qabolkan seugala doa.
AL BAAQIYUL WARISU isman.
Useuha dagang raseuki gata.
Adak pih bacut allah brie manyang.
Sampoe that pajan nikmat lee kanda.
Menyoe na murid bangai Ngoen babal.
Kureung fikiran nibak beulaja.
Nyoe geu tem baca peugoet tulesan.
Ngoen izin rahman meu ubah sigra.
NUHUS SHABURU bukan cubaan.
Seugala macam dalam useuha.
Hate yang saba deungoen tujuan.
Ureung di seugan keu sidroe gata.
Et hoe ka habeh rawi loen sulam.
Aduen Ngoen abang cuba pareksa.
Watee neu baca neu peurhatikan.
Kadang han reumbang lage bak maja.
Kadang dum iroet suroet loen karang.
Peu cocok nadham ka gadoh makna.
Kadang ka singeet ringeet han timang.
Uloen latihan wab galak sastra.
Nyoe na faedah rika loen sulam.
Rahmat bak tuhan yang maha kaya.
Kadang dum silap dan kejanggalan
Bangai loen tuan sidroe manusya.
Loen lakee meuah ateuh karangan
Dari mulaan akhiran teuma.
Sa dua Ngoen lhe.peut limoeng keu nam.
Keu tujoh taulan kheun ureung tuha.
Ka habeh rinteh faedah isman.
Keu asma tuhan meung soe yang cinta.
hana le panyang haba lam kalam.
Lajue loen reupang salam alaika