Cae Aceh HABA BHAH GAEB
OLEH: LISA ULFA
Salam'alaikom awai phon kalam
Saleum lon hidang keu ulee baet
Lon ujoe tuleh rinteh sikarang
Asoe di dalam "Haba Bhah Gaeb"
Ammaba'du buhu mate "an"
Meupadu ngoen "am" Seureta lom "et"
Ladom meujampu dengoen buhu "ang"
Na syit meujan-jan jitron buhu "eb"
Surah ka lumrah lam pendengaran
Nyang neusampaikan le tgk khateb
Yang bahwa manyet dak singet badan
Troh lam kuburan keulayi hudep
Lheuh 3 boh langkah ureung berjalan
Meunyum le rijang tuboh meusupet
Mata ka teuhah leumah supot klam
Pajan 'an malam seudang goh meugreb
Teuhireun keudroe rangoe ken wayang
Sapue tanle trang laot ngen buket
Meunan phon mula teurasa bimbang
Oeh lam kuburan preh-preh geubangket
"Man Rabbuka"tiba soalan
Mata teurpejam babah meugampet
Tamita-mita puetra jawaban
Hasel pih ka tan walau sijumpet
Sigra le busoe asoe "jimakan"
Keunoe hantaman meuleumpah saket
Malaikat poh dum keukuatan
Ateuh siksaan tamoe meuet-et
"Man Nabiyuka" Sigra neu ulang
Laen soalan malaikat raket
Gabuk le raya mita jawaban
Oeh dudoe pih tan dalam geunampet
Busoe nyang suuem jitaluem rijang
Meu-ulang ulang geupoh geubangket
Hana soe bantu ibu tan sajan
Deuk grah wate nyan hana meupue jeb
"Man Imamuka" Gema meuguncang
Pue lom jawaban tamita kob trep
Ateuh soai nyan pih ka tan na ilham
Ngen busoe panyang malaikat cupet
Senja meugantoe uroe meu ulang
Luho ngen malam asa keu meugreb
Taharap sabe kiamat datang
Pajan keuh pajan sang-sang cukop trep
Haba bhah gaeb nyang ulon peutrang
Haro hara nyan bagi ureung pet
Masa lam donya lena digop nyan
Ateuh amalan geupeutrep-peutrep
Yoh mantoeng bocah balia sedang
Lalee that badan ngen bude karbet
Umu ka muda beda santapan
Laen piasan tema geulet-let
Maka dari nyan wahe dek intan
Mita amalan mita beuget sep
Supaya singoeh wate tariwang
Bak laen alam seunang tahudep
(Jeunieb, Akhe januari 2019)