CAE ACEH SEULAMAT MILAD/ULANG TAHUN ADINDA
Detik keu detik meunet meutuka
Namplôh gö puta meugantoë ngön jeum
Uroë keu uroë minggu geukira
Peut gö seulasa geukheun sibuleun
Dua blah bulan oh nan trôh masa
Baroe jiteuka sithôn keurajeuën
Seulamat milad intan bahgia
Teuka dua sa umue teulinteung
Berkah ileume hudép seujahtra
Puja yang esa meubek na meutheun
Horeumat ayah seureuta bunda
ureuëng nyan dua meubek neu meukheun
Horeumat gurèe pernoe alehba
Gurèe sikula sigala bideuëng
Horeumat rakan sahbat seugala
Ukhwah neujaga nibak nyoe tahuen
Do'a meu iréng dinda setia
aman sijahtra sihat beu meuteung.
Sehat di badan haté seureuta
Asoë kepala ilme beu useung
Beujroh 'itikeut didalam dada
Beurayok saba peureunoe ureuëng
Meubek na beungeh lam tiba tiba
Irie ngon riba bèk peunyuem peunyuem
Maken meunuendok tasawôh gata
Kusyuk ngon ridha beujeut keu ayeum
Jeumot nibak but Allah simata
kalam lam dada beusabe neukheun
Dua blah jaroë do'a loen pinta
nibak nyoe masa keu sidroë ureung
hana yang laen didalam dada
Serta lam do'a nama uloen kheuën
Meulakèe meu'ah beurayok ridha
Hana bak kanda romantis rimueng
Hana lam kadoe keu ija sutra
Hana ciet dinda perak deungon jeum.
Hana sapeuë na keutanda mata
Han mungkén lon ba bayam ngon naleung
Hana ciet mungkén kawe sedia
Peulom tajak ba ungkot ngon udeuëng
Cuma nyang mudah ilah ngon do'a
Jeumot usaha bagah na rinyeun
bagah meusapat haleu simata.
Meupuwoe gisa nikah meuteumeung
Hudép jeureunèh lam rumoh tangga
Pleupeuk meuria bak binèh neuheun
dua geutanyoë tasaba saba
Dang dang na harta serta keurajeuën
Meumada oh noe ucapan kanda
Uroë bahgia dinda lam mideuën
Meu undoe jaroë bak tuléh kata
Saleum sijahtra salam'alaikum
اَللهُمَّ اِنَّا نَسْأَلُكَ سَلاَمَةً فِى الدِّيْنِ وَعَافِيَةً فِى الْجَسَدِ وَزِيَادَةً فِى الْعِلْمِ وَبَرَكَةً فِى الرِّزْقِ وَتَوْبَةً قَبْلَ الْمَوْتِ وَرَحْمَةً عِنْدَ الْمَوْتِ وَمَغْفِرَةً بَعْدَ الْمَوْتِ
Ya Allah kami memohon kepadaMu keselamatan dalam agama, dan kesejahteraan/kesegaran pada tubuh dan penambahan ilmu, dan keberkahan rizqi, serta taubat sebelum mati dan rahmat di waktu mati, dan keampunan sesudah mati.
رَبَّنَا هَبْ لَنَا مِنْ اَزْوَاجِنَا وَذُرِّيَّاتِنَا قُرَّةَ اَعْيُنٍ وَاجْعَلْنَا لِلْمُتَّقِيْنَ اِمَامًا
Ya Tuhan kami, Anugerahkanlah kepada kami, istri-istri kami dan anak cucu kami sebagai penyenang hati kami, dan jadikanlah kami imam bagi orang-orang yang bertaqwa