PANTOEN NASEHAT KEUMUDO INSAN
OLEH: LISA ULFA
Meusambông-sambông, bak jeub-jeub suroe
Allahu akbar, Muazin lantôn
Kuta ngön gampông, ban saboh nanggroe
Semilir angèn, peurireue ie-mbôn
Na rhöt công bubông, ladôm u bumoe
Insan terlelap, meukuwien lam krông
Mantöng meu-ayôn, lam kisah lumpoe
Suboh pun lewat, tan meupat untông
Karna sang Rabbôn, goh insan pujoe
Beudoeh óeh leuh nyan, jak rata jurông
Nafkah dijunjông, keu aneuk binoe
Hayya 'alash-shalaah, teu-ulang lantôn
Tanda di gampông, luhô ka sampoe
Sedang di insan, sibôk bak warông
Peu asoe lambông, ngön macam bagoe
Yang harkat di blang, atauwa keubôn
Luhô di ampôn, meujan tan geuwoe
Tinggai sembahyang, meu-buleun meu-thôn
Wareh ngön karông, terlena tuloe
Yang hudep mewah, geutamah susôn
Harta geuhimpôn, lam tip-tip uroe
Kana sigantang, peurlei sikarông
Ho yang meurôn-rôn, keunan geupeutoe
Sedang si gasien, teuluntang-lantông
Beuthat diranggông, tanna soe pakoe
Bak mita nafkah, dikeubah Rabbôn
Hudep meuthôn-thôn, lam cula-caloe
Perahô insan, jalan ka sirông
Tamse meukurông, bak saboh puloe
Meugisa-gisa, lam saboh jurông
Nahkoda bingông, arah keumudôe
Wahe cut buleun, Aduen sitampông
Ingat hai kaôm, janji yang lampoe
Umu 4 buleun, gata lam kandông
Sumpah ngön Rabbôn, beuna tahimboe
Bek le peusingöh, Allah tasanjông
Sebab Ilahôn, Neupreh Geutanyoe
Sunggôh percuma, ta-klik meu-ông-ông
Watei diampôn, ka teu-ëh sidroe
"Maka nikmat Tuhanmu yang mana lagikah yang engkau dustakan"