Cae Aceh Penyesalan Meucinta
OLEH: Lisa Ulfa
Gersang sigala teuka musem khueng
Abeh yuek ie krueng lam lueng pih saban
Dahaga pade mate dum naleung
Harok keu ujeun grah keu minuman
Meunan keuh tamse hate lon tunyum
Laksa musem khueng nibak sa'ah nyan
Cinta lon rabe wase gop peuplueng
Ku'eh peukateun kumbang idaman
Gulana tuboh rapoh ngoen tuleung
Sidroe lon peutheun uroe ngon malam
Bu nyang lon pajoh sunggoh tan meunyum
Mameh ngon keu'eung terasa saban
Kala gaseh lon phon meuteung-bayeung
Meuhambo di leun sgala harapan
Cita-cita jroh meuroeh-roeh bandum
Ka putoh beuneung nibak ikatan
Keubit lon benci pasi ngoen buleun
Nyang lam tip-tip jeum jisayang-sayang
Iri lon pandang insan tersenyum
Bak wajah ranum ureung kasmaran
Sang-sang donya nyoe eh noe teu binteung
Mata uroe plueng ho laen alam
Nyang na cit supot sagop meu diyeung
Lon sangak raheung sidroe meu lang-lang
Hingga troh masa lara meuking-keung
Lon jipeureumeun le sidroe insan
Baho jisundi jibri keunaleung
Jisampoh ujeun nyang rhot meubram-bram
Gerhana jiweh lileh dalam jeum
Keu layi lom juem hate cut intan
Bijeh pih timoh meusunoh kob dum
Ban kulat jumpung rame hana ban
Hingga lon tuwoe keu droneuh aduen
Sejarah useung lon niet keunangan
Dendam lam hate reule meukeng-keung
Khieanat jameun lon cie lupakan
Sa'ah bahgia teuka lam lumueng
Ngon laen ureung ulon mulakan
Pakon neu gisa gata meu diyeung
Keu lon neu suleung saboh harapan
Meu'ah bang meu'ah sipatah lon kheun
Han mungken lon tueng yang neu sesaikan
Saleh pih rasa hana le meunyum
Meu ube kumeuen tan le na sajan
Dan lom han mungken lon salen jangeun
Keu dua ureung lagu lon deundang
Suci gaseh lon harom bei meunyum
Hana meucabeung ban hate tuan
Komentar Oleh:
Allahurabbi, paki musém khueng
Bak kayé naleung, ka abeh geursang
Tuhan ku neubi, tari cut buluen
Bek lé lam jangeun, gundahan pasang
Jinoe ka sampoe, ngen sidroe ureung
Mungken nyan aduen, geunaseh intan
Yang awai teutiek, kariek bineh lueng
Uwap peukateun, peurasa reuhang
Beu'ek abadi, gaki si ateung
Bek roh teulinteung, narit gob pasang
Teukeudi nyawong, keunong allah tueng
inan ju takhuen, meupisah badan