Cae Aceh RINDU MEULABANG
OLEH: Bayu Cempaka
Ranup seulaseh timoh lam uteun
Si aneuk bayeun ulee jih puteh
pane lon teuwoe,keu sinyak mideun
cut bang meujangeun,hate puteh gleh
keu Dara canden lon kheun nyak mideun
Ulon meujangeun ingat keu gaseh
walau lam rimba,gaseh lon peutheun
demi cut beleun,gampong beurandeh
Harapan kumbang neuk gapai buleun
Saboh seurayung deungon sapat eh
Menan lon rinteh harapan adun
Keu calon imum niet loen cukop gleh
abang meuranto,siat keurajeun
loen tinggai bayeun,ie mata peudeh
ta saba siat,hai putroe mideun
cinta lon peutheun,han lon peu jaeh
nanggro malaka,keurija aduen
sithon sibeleun,sino di blahdeh
sutra malaya,bungkoh ulon kheun
keu adek mideun,keu tanda gaseh
cinta han putoh,aral meulinteun
tanyo peutumuen,tan so peu jaeh
uroe ngon malam,ingat cut buleun
adak langue krueng,restu beujadeh
sie Cicem subang.di dalam uteun
di Aneuk bayeun.takue jih puteh
Tasaba siat.hai putro mideun
Cinta di adun.cukop that puteh
Komentar Oleh:
Subhan Droe Teuh (Meunoe di balah lee dek mideun hai)
Buleun dua blah,,teuka di ujeun
Punoh ie lam krueng,,bacut hana gleeh
Laloe ngen janji,,di cut bang mideun
Nacan peutumuen,,kagob cok gaseeh
Pulom yue saba,,dang akhee buleun
Meunye di aduen,,mantong di sideh
Disinoe adoe,,karap han eek theun
Ulee meusunyung,,teungeut lam binteeh
Ulòn preh sithòn,,hana meudiyeung
Harapan aduen,,ulòn peu habeeh
Han ek tasaba,,ka siploh buleun
Bah tinggai aduen,,ngen janggòt puteeh
Han ek lee tapreh,,umu ka useung
Takot meusareung,,deungen ureung jeeh
Singoh bek peugah,,salah dek mideun
Panggang ji puplueng,,buet agam paleeh
Melati kumang bineh seurayung
Oh pengeuh buleun duroh meubareh
Rindu meulabang sabe neu peutheun
Saba hai beleun dang lon wo blah deh
Gaseh tabina sithon lhee beleun
Harap di adun bek ta melanggeh
Ranup seulaseh lon ba u mideun
Ngon tungku imum ulon ba wareh
Janji ka sampo uroe ngon buleun
Puwoe u mideun gampong beurandeh
Ateuh bahtera puwoe cut buleun
Asai sapue kheun lamunan gaseh
Bungong Cempaka timoh lam uteun
Oh keunong ujeun duroh yang puteh
Dak tabi laen yang puteh galeun
Tetap lon petheun putroe beurandeh
Subhan Droe Teuh sira teukeujòt..karòh di suòt lom dek mideun...
Museem meugantoe,, ujeun deungen khung
Geunab lhee buleun,, ujeun meutindeeh
Jiteuka rindu,,hana pat peutheun
Bagah hai bang pleun,,neuwoe ju keudeh
Reudòk di seuntang,,lam gunòng ujeun
Rindu meusareung,,rasa that peudeeh
Yang ka talewat,,sithòn lhee bileun
Pue lom yue peutheun,,tuha bak tapreeh
Teumpat di ungkòt,,jiduek lam kareung
Sinan di plueng plueng,,suree ngen bileeh
Tadingo janji,,preeh abeeh buleun
Nacan ulòn plueng,,meunye tan jadeeh
Rap matang kuli,,kateuntee blang jruen
Yang toe ngen bireun,,nyankeuh blang blahdeeh
Neuwoe ju bagah,,lon preeh sibuleun
Yoeh goh ulon plueng,,u nanggroe inggreh