CAE ACEH KISAH MAK MEUGANG ANEUK YATIM
teuka seupoet klam ban sigoem mata
saleum bak mula uloen peu karang
keupada rakan meu soe yang baca
uloen neuk kisah suai mak meugang
wahe dum taulan dusoen ngoen kuta
meuah keuh dilei ritei loen paban
menyoe na kalam kadang nyang gasa
na sidroe aneuk manyak mantong ban
bak poma badan di jak meu haba
wahe ee poma pajan mak meugang
peu intreuk malam atawa lusa
uloen that meuheut keu sie ta panggang
lagei rumoh nyan bunoe yoh asa
adak na ayah gohlom meuriwang(meuninggai)
keu si mak meugang loen teumei rasa
poma neu seuoet aneuk loen sayang
singoeh mak meugang bukoen keuh lusa
saba ta saba hai bungoeng mancang
singoeh mak meugang mak mita cara
ie mata tijoh sidroe poma nyan
teumpat aduan gobnyan ka hana
ka tinggai sidroe binoe meu lang lang
ngoen aneuk badan si batangkara
singkat ceurita uroe ka malam
poma aneuk nyan Han teungeut mata
ule di rawe geu pike kiban
keu si mak meugang pat toeh geumita
aneuk ka teuduek di leun di pandang
yang lalu lalang geujak beulanja
ladoem ngoen moto geujak bak jalan
ladoem hai sayang geujak ngoen supra
rasa sang hancoe hate sang leukang
di poma sayang kaloen aneuk nda
meuseubab gasien hana soe pandang
hina bak insan hana hareuga
geu sawak jeulbab ija geu pinggang
geujak u peukan rangoe geu rasa
di kheun di aneuk lajue masanyan
hai poma sayang di loen asoe pha
meu tamah reumoek meutamah bimbang
meutamah leukang jantong lam dada
rasa biet leumoeh awoeh sang badan
seubab hai taulan hana rupia
ie mata ji le lajue meu gram gram
geu sampoh teuman ka nibak ija
oh ban ka geujak geu paleng badan
geu kloen ruman sibungoeng jumpa(aneuk)
teuseuheh di khem aneuk manyak nyan
meutamah runyam hate di poma
di kheun le lajue hai poema sayang
intreuk di peukan bek treb mak gisa
jantong ka hangoh mubei sie panggang
meuseubab beuban nyang poma rasa
paki ya allah paki ya rahman
kiban ya mannan peu leumah cara
hana le daya hate ka runyam
keu-eung ngoen masam hana le rasa
oh ban sare troeh keudeh u peukan
rame meu kuyan rakyat meu jeumba
teu tahoe tahoe meu hoe geu pandang
geu neuk teuguran male geuh teuma
seubab hana peng hana tawaran
keu sie mak meugang hana ngoen kira
geu gisa gisa ban saboh peukan
meu sidroe insan hana soe sapa
teu-oet ka leumoeh atoet sang ceukang
hana kuatan pitam geurasa
teuduek teusinthop di ateuh jalan
rubah poma nyan sinan teuhanta
ureung meutamon meu duyoen keunan
meusoe ureung nyan peu saket teuma
kheun sidroe ureung sinan bak jalan
wahe dum rakan kheundak rabbana
ureung inoeng nyoe kheundak bak Rabban
bukon keuh pinsan nibak nyoe masa
ka habeh umu nibak nyoe jalan
pat keuh asalan(alamat) hai ureung lingka
uloen koeh kisah meuah hai abang
mangat bek panyang asoe ceurita
aneuk di rumoh tahoe teu jeungang
moto ambulan meu yang troeh teuka
meu soe keuh saket dalam ambulan
pakoen keuh lheuh nyan keunoe di teuka
oh ban di kaloen ruman di intan
poma di sayang ka teu toep mata
di plueng ngoen di wa di moe moe sajan
di com di kuran jenazah poma
ureung teu doeng doeng bineh ambulan
geu kaloen ruman aneuk ngoen poma
di gule gule si bungoeng mancang
nasib bak tuhan ka meunan kada
aneuk nyan jikheun bak poma sayang
neujak upeukan neujak beulanja
meu pat keuh poma keu sie loen peusan
uloen neuk panggang meuheut loen raya
ka dari baroe mubei sie panggang
dari rumoh nyan meuheut loen raya
beudoh hai poma yang uloen sayang
neujak peeh asam ngoen kicap sigra
bek le poma eh di ateuh tilam
jak tajak rijang u dapu teuma
di tarek tarek jaroe ngoen badan
oleh aneuk nyan jeunazah poma
ureung duem geumoe inong ngoen agam
hancoe meu gram gram bak sang geurasa
si aneuk yatim gasien loem teuman
jinoe hai rakan ka hana poma
hancoe lam hate oh geu bayangkan
meunan that ruman aneuk seungsara
kiban keuh nasib nyoe aneuk gobnyan
wahe ya tuhan neu tuloeng hamba
seungue kutika seupi lam alam
ureung dum sinan meu grak ka hana
teu tahoe ganteo teu doeng doeng sinan
breb broeb teu lheuhnyan deungon ie mata
kiban keuh rasa meunyoe lagei nyan
bak tanyoe rakan bandum syedara
kiban keuh hancoe dada teu guncang
kiban keuh leukang hate lam dada
allah ya allah allah ya rahman
neubrie aneuk nyan beu rayoek saba
neu brie beu tabah uroe ngoen malam
meuah hai rakan kisah loen pada
Sigli 28 -04-2019
Uleh: UH-AA