Cae Cinta Han Sanggop Pawang
oleh: Asna Acola
Gantoe peuneusan,mangat ta teupeu
Lam suasana cuaca malam
Buleun teumaram meuwap geulanteu
Keubiet sang hai dek bak tilek pandang
Mandum jeut pincang Bena ikhtiyeu
Seulat Malaka raya geulumbang
Han mampu tongkang ulon peulingkeu
Keubiet Han sanggop bot ulon Pawang
Aroh meubeuntang Meu gunong di keu
Andai peu turoet laot lon seubrang
Kateuntee karam reubah lam ie deu
Seubab na rongga warna pandangan
Beda tingkatan meugareh teu ceu
Tamselan bumoe sinoe daratan
Ngon langet Manyang meunan keuh miseu
Gata seubagoe cut Putroe intan
Hudep lam mapan ngon jithee hayeu
Sedangkan lon Nyoe sidroe nelayan
Sigoe goe kadang peurabe keubeu
Maka jeut lon toep punjot harapan
Ngon perasaan peudeh meu ciceu
Dak pih lon lanjot Han sanggop padan
Ateuh daratan mustahe lon-eu
Jaroe lon tadah Babah Meu Kalam
Doa lon layang beutroh teu bayeu
Moga keu canden na laen pawang
Aroh geulumbang sanggop peulayeu
Malam kalaroet jiloep Dum bintang
Cahya rembulan gantoe ujeun preu
Ehnoe ulon toep rawoet tulesan
Ulee Ka mumang ngon Babah tabeu