Cae Seunda Kisah Pawang Poe jalo
oleh: Subhan Droe Teuh
Pembaca madah,, Fajar Lambaro (Radio Meugah fm)
Ban mandum rakan,,seurta fans Megah
Neu dingo bagah,,peuhah radio
Ujoe meurawi,,uji seu meugah
Cukop na payah,,nibak Meu ato
Kata meu susoen,,meu sanjoeng patah
Meu macam kisah,,Meurah Poe jalo
Dua droe pawang,,meusilang langkah
Teungoh meurupah,,lam saboh jalo
Sidroe Meu atreet,,lam poefeet reubah
Maksud lon peugah,,wajah ka loyo
Jalo ka dimoe,,rangoe ngen birah
Ka Mirah Babah,,si Putroe ijo
Teulanjo cinta,,keu kanda Dolah
Putroe Rabi'ah,,sidroe teutaho
Walau cukop phet,,sabeet keu jeulah
Han jiteem langkah,,ho laen tajo
Rasa teu hanyot,,lam laot luwah
Watee geu peugah,,nikah ngen dindo
Ramphak nibak dheun,,si cabeung lawah
Angeen peu goyah,,patah meuhambo
Pawang di Timu,,tungku Meutuah
Sayang sileumpah,,suwah ek beko
Sabee lam janji,,kami menikah
Hana lom jeulah,,pajan ek Linto
Putoh harapan,,hatee sang beukah
Suwah tijik tah,,langkah u solo
Di Pawang Panton,,Laen lom kisah
Peungayoeh patah,,karam dalam tho
Pawang Ubayya,,jinoe ka jeulah
Na soe hoi ayah,,Hana teu taho
Di pawang Bayu,,sayu lam goyah
Sijalo ceudah,,kagop yang pEto
Meukumat sa-oh,,putoh lom kisah
Si ulah ulah,,ka beukah kaso
Di pawang Musri,,ka meuri teulah
Karoeh meuramah,,ngen janda meutro
Salah cok resep,,meugancheep lidah
Haba kaleupah,,salah meututo
Watee meuturi,,gini di peugah
Mantong lam keurtah,,Hana lom kundo
Dudoe keucewa,, di Apa dolah
Rupajih geutah,,kabeeh meuhambo
Pawang Meurante,,kareulee arah
Ban laot luwah,,ie mata Karo
Gagal keu Abi,,meuhi ka susah
Kupi dalam glah,,teurasa Milo
Yang cukop paloe,,si Nadar gagah
Meutulak kisah,,ngen Dinda baso
Masa di rantoe,,di nanggroe Sabah
Saboh seujarah,,masa di joho
Cut Abang itam,,Agam meutuah
Ngon kak Aisyah,,geumukat bakso
Kareuna ramee,,langganan singgah
Keuneuk cok kuwah,,roeh meucok teko
Leumah lam ruweung,,ureung mat capah
Cut Yana ceudah,,ngen Fida baso
Teudong bak pinto,,Atok Lam panah
Ngen bajee mirah,,sipatu polo
Dilikot kidee,,Oma Cot pedah
Om Afan latah,,teuduek bak jambo
Teungoh meupakat,,intat beubagah
Syeh Syoh Yang gagah,,geujak peujudo
Ngen dara tari,,dari Lhok gajah
Sidroe ustazah,,keu dara baro
Jaweub bang Rian,,nyan chit cukop paah
Alhamdulillah,,cocok that linto
Dudoe meusahoe,,meucaphoe madah
Si Jeumpa Mirah,,Ncek Minda Laro
Ka meusoe pawang,,Hana lam gogah
Kutika latah,,Kana soe sumbo
Meujampu rasa,,Nyak Misraa basah
Tan mupat galah,,ngen choet boh sawo
Diteuka digee,,sasabee birah
Geutudoh salah,, Kanda Vario
Tiep tiep boh Kayee,,teuntee meugeutah
Bukon musabah,,ngen gumbok Pinto
Uram seumiroeng,,ujoeng seumeurah
Mungken na salah,,surah meuhambo
Pawang Seumantoek ,,pucoek Seulawah
Ureung yang ramah,,dalam meututo
Mupat na kureung,,siseung neutamah
lon lakee meu'ah,,kadang teulanjo
Ucap wassalam,,sekian sudah
Tamamatul madah,,kisah Poe jalo
Salam Alaikom,,keu kawom ayah
Ngen kawom ummah,,mandum seureuto