CAE ACEH LAM JANGEUN LAGU
TUGAIH DARA
OLEH: Lisa UlfaSalam'alaikom nibak phon buhu
Doa beumakmu keu ureung Aceh
Pade dalam blang kacang dengon U
Harga bek reuteu oeh panen jadeh
Jeub rata tempat barat ngon timu
Saleum lon tuju han meupeukabeh
Tuha ngon muda gasa ngon lugu
Asai na umu bandum lon cukeh
Beh jak hai cut kak bapak ngon ibu
Taci meulagu jangeun tengku syeh
Tentang didikan dendang beusyahdu
Didikan Ibu keu bijeh-bijeh
Lam rumoh tangga beda sigeutu
Meunan keuh laku jameun di Aceh
Keu aneuk agam poma hidang bu
Sedang nyak meulu wajeb beugigeh
Dara di rumoh harus beumampu
Peugot tumon bu ngon kuah lodeh
Watee na khauri nyak ti bek tunu
Lam hai ku-ku U nyan pih beu bereh
Poma peuturi panci ngon sangku
Mata geulungku sampoe troh bak keh
Sejak remaja dara geupandu
Masalah dapu wab ken hai eleh
Oeh teuka malam cut intan ayu
Bak beut meunuju lheuh trep meupreh-preh
Hukom agama beuna lam qalbu
Amanah Abu meunan geusyareh
Dara di Aceh gigeh keuh ta eu
Jeut jipeulaku dak kreung ngon rimeh
Oeh luho uroe dang geuwoe Abu
Kuah boh labu kana lam topleh
Selawet jameun jinoe ka maju
Reusam indatu le that ka cumeh
Contoh sikada lon ba lam buhu
Masalah dapu le yang peukabeh
Lam rumoh tangga hingga jeut karu
Sereng beradu jareung na rumeh
Dara ka tuha angka bak umu
Meujitaguen bu golom get bereh
Buken hai adoe hanjeut bloe buku
Cita keu guru ken bek ta raeh
Cuman beusaban paban beusatu
Tugaih bak dapu beutatem cukeh
Kodrat geutanyoe bek tadhoe laju
Ngon wab hai meulu gelar ka lubeh
Takhadam lakoe bek sampoe reuteu
Beujroh prilaku tuto beumameh
Beurijuek balee lalee di cong U
Aneuk leuk kutru jipo ho aleh
Kasep keuh oeh lon rampoe lagu
Pat yang keliru tulong peusaheh