NASEEB PAK GEUSYIK
oleh: Syi Musreh
lam lampoh rumoeh, timoeh bak coklat.
timoeh bak langsat, di dalam huteun.
Asalam a'laikoem, saleum loen intat.
jaweub keuh siat, meubeik neu theun_theun.
syukoer ngeon pujoe, keu po' Hazarat.
yang kireim Rahmat, keu tanyoe banduem.
yang peujeut laoet, riboet ngeon bakat.
yang peujeut Darat, langeit ngeon beuleun.
Rasul ILLahi, nabi Muhammad.
ta kireim Leugat, seulaweut saleum.
keu KeLuarga, seurta Al _ sahbat.
sama ta intat, wahe eo aduen.
para Ulama, rata jeut teumpat.
Ta'kzeim horeumat, seureuntak ta kheun.
nanggroe geusatoeh, jroeh ngeon syariat.
yang bi Nasehat, hana tom kureung.
beuthat han muphoem, susoen hikayat.
loen takat_takat, dak bacut keing_keung.
dak asoe rika, hana that mangat.
kalheuh loen intat, keunoe dalam seung.
nasib pak geusyik, loen tiek eo sahbat.
hana tom mangat, jameun keu jameun.
ka sama corak, dak beurang kapat.
mameh deungeon KLat, sidroe geu peutheun,
haba lam gampoeng, kawoem uloen Lhat.
bak jinoe saat, parah duem ureung.
si uroe suntoek, siboek lam upat.
keubiet that Ladat, bak buet jungkat keung.
ineong ngeon agam, macam tabi'at,
contoh hai sahbat, cuba uloen leung.
meuwab peng desa, keon na dum that_that.
nyan saboeh seubab, dawa duem ureung.
keu geusyik gampoeng, ladoem di hujat.
macam di jungkat, hanyi geulinyueng.
wab niet hana troh, beuroh peurangkat.
ka di meupakat, hoi aneuk kumuen.
ladoem bak jambo, ato siasat.
upat meu upat, sampe meujeum_jeum.
dinan geu bahaih, baih Rumoeh Rehab.
peureuseih sahbat, lam rapat umum.
geusyik lam desa, na yang meu tat_ tat.
ulei di kap_kap, pike su ureung.
macam di dawa, le masyarakat.
ban bacuet silap, ka di lakei glueng.
ulei geuh mumang, peutimang Rakyat.
bak geu peuteupat, haba goeb linteung.
peu loem na wareih, paleih si urat.
meuheut peurangkat, hana meuteumeung.
nyeo hana roh droe, jinoe seip gawat.
keu geusyik meuhat, peu salah banduem.
tudoh meu nudoh, han teudoh siat.
dak beurangkapat, meunan peukateun.
o'eh na bantuan, anggaran leungkap.
kana dalam rap, meubagoe bideung.
cit kana hai bang, tukang khianat.
di dalam rapat, macam meukheun_kheun.
adak meu salah, tingkah han teupat.
mungkein wajar that, nyeo peng geutaluem.
tapi yang gura, rata jeut teumpat.
geusyik di hujat, dak beutoi aduen.
na yang ditudoh, pajoh peng kawat.
na yang di upat, pajoh peng papeun.
pokok jih geusyik, dikritik seip brat.
ban han troh hajat, sidroe_ droe ureung.
keuneong keu po jeih, wareih yang arat.
rumoeh di rehap, beik le na ruhueng.
ka bungeh po nyoe, sagoe reot barat.
geusyik cit sahbat, ujoeng jih diplueng.
ureung ka kaya, harta meu lipat.
hudeip ka mangat, na blang ngeon neuheun.
goebnyan pih saban, dinan geuharap.
keon cukoep gawat, nyan cit geuraheung.
maka lam gampoeng, kawoem jeut teumpat.
karu ngeon upat, han jeut ta hireun.
meuwab lam Desa, beda peundapat.
han sapeu pakat, hingga meukeung_ keung.
uleh seubab nyan, rakan keurabat.
dak keon peurangkat, na gaji beuleun.
karna geutanyoe, seubagoe rakyat.
dak hana pangkat, yang jroh ta peutheun.
sayang that pade, tangke meu ulat.
sayang bak tomat, ka patah syadheun.
o'eh noe keuh caE, beik Le panyang that.
meupat na silap, meu'ah keuh banduem.