Pemenang Sayembara Pantoen - Cae ACEH Menyambut Ramadhan 2019 - Juara I
Oleh: Maksud Lon Peugah
Ateuh bak jati, keudidi ji eh
Dicong bk manggeh, aneuk tuloe breuh
Salam a'laikom, mula phon bareh
Saleum lon lukeh, keu rakan lam seuh
Hana yang meutheun, mandum teuseureh
Blah noe ngen blah deh, miyup ngen ateuh
Keu fans-fans cae, gure lam rinteh
Meu'ah silapeh, meupat na ceubeuh
Syukoe ngoen pujoe, tapuwoe keudeh
Maha pengaseh, jaroe uwateuh
Yang peujeut alam, awan meulapeh
Langet tan binteh, leumah trang peungeuh
Seulaweut saleum, takheun seuireh
Sidroe peungaseh, teuleubeh ateuh
Nabi MUHAMMAD, meuhat ta pateh
Ureung teupileh, dile phon kalheuh
Keu al sahabat, sapat si binteh
Yang tem meu abeh, islam geupeudeuh
Yang tem peujuang, sajan barojeh
Dum kafe qureh, sare geukireuh
Neubaca Chiet:
- Pemenang sayembara pantoen Maulid NABI JUARA I
- CAE ACEH SEUJARAH LAMPOE DUDOE SI CUPAK
- PEMENANG SAYEMBARA PANTOEN - MAULID JUARA II
Bagoe peuwareh, nabi keuneulheuh
Ureung yang peuphom, hukom bek lipeh
Meupat yang jayeh, geutanyoe weng weuh
Keu muqadimah, kaglah silapeh
Bek le ta cureh, panyang meu reuh2
Haba lam rampoe, jinoe lon tuleh
Judul hai wareh, kana di ateuh
Abeh musem blang, layang meubareh
Sinoe ngen sideh, ban takalon deuh
Teuka ramazhan, sya'ban pih abeh
Tasamboet beugleh, ngen Hate peungeuh
Nibak puasa, ka tanyoe rayeh
Keu bandum wareh, islam seuluruh
Yang na lam donya, sama geumeuceh
Keunoe ngen keudeh, geutanyoe inseuh
Mari beusaban, rakan ta peugleh
Gaseh meugaseh, dendam bek le deuh
Bek na lam dada, rasa meu greh-greh
Seusama wareh, bekta meuyeuh yeuh
Beuleun puasa, fahla meulapeh
Soe yang meu abeh, ibadat peudeuh
Yang pubut suroh, sungguh seumateh
Fahla geutindeh, singoh ta limeuh
Miseu teuraweh, beugigeh wareh
Dak saket beuteh, saba tapeulheuh
Ban lheuh seumbahyang, dang-dang ta eh-eh
Qur'an tatindeh, tabaca ngen kreuh
Meusoe yang laloe, rugoe teuh abeh
Gadoh bak ta eh, lale keumireuh
'oh uroe dudoe, paloe meupayeh
Ban tawoe keudeh, baro teuka weuh
Kaseb meumada, rika lon rinteh
Yang ka lon cureh, di dalam rateuh
Meupat na irang, kadang lam bareh
Bek jeut meulanggeh, haba ulon creuh
Meu'ah beurijang, irang ngen jayeh
Tebai ngen lipeh, leumik deungon kreuh
Maklum lon tuan, cit ban meurinteh
Ilme goh abeh, cara peh dabeuh
Deungon wassalam, lam akhe bareh
Ca'e ka abeh, tanda seuneulheuh
Meu pat na salah, meu'ah beu abeh
Jaroe bak tambeh, lon boet u ateuh
Wassalam